Pynstet noh ïa ka jingpynbeit pud ha ki thain Langpih, dawa na u CM bad Chairman RC

Shillong, Jymmang 29 : Ka kynhun ki nongïalam jong ka Raid Mynsaw ryngkat u President jong ka HSPDP Bah KP Pangniang, ha ka sngi Thohdieng ki la leit ban ai da ka dorkhas sha u Myntri Rangbah kumjuh sha u Chairman ka Regional Committee ka West Khasi Hills Bah Paul Lyngdoh ban kyrpad ïa ka sorkar ba kan pynstet noh kham kloi ïa ka jingpynbeit noh ïa u pud u sam ha Langpih sector kaba hap ha West Khasi Hills.
Na ka liang u Nongïalam jong ka kynhun, Bah KP Pangniang u la ong ruh ba ha ka jingïalang paidbah kaba long ha ka 19tarik u Ïaiong mynta u snem baroh ki nongïalam shnong, ki riew rangbah bad ki nongmihkhmat ki la ïa mynjur lang ban kyntu ïa ka sorkar jylla ba kan pynstet noh ïa ka jingïakren pynbeit pud ba ïadei bad ka Langpih Sector kaba dei kawei na ki hynriew tylli ki jaka ïa kajia pud hapdeng ka Meghalaya bad Assam ha ka kylla kaba ar.
U Bah Pangniang u la pynpaw ruh ba ki paidbah ka thain Langpih ki pynpaw ka jingsngewnguh ïa u Myntri Rangbah ka jylla bad kumjuh ïa u Myntri Rangbah ka Assam kiba la wan ban jurip lang ïa katei ka thain ha ka 16tarik Naiwieng, 2022.
“Ka jingwan jurip lang jong kine ki Myntri Rangbah ka pyni ïa ka jingshimkhia jong ki ban pynbeit noh ïa ka jingkajia pud hapdeng ka Meghalaya bad Assam kaba la neh slem slem bha,” u la bynrap biang.