Jowai, Nailur 22: Shi bynta ban kyntiew shuh shuh ïa ka rukom sengkam la jong ne ka MSMEs Entrepreneurs, na ka liang ka Reserve Bank of India (RBI), Shillong mynta ka sngi kala pynlong ïa ka prokram bala tip kum ka ‘Town Hall meeting on Micro Small and Medium Enterprises (MSMEs) haka shnong Thangbuli Club Hall, Amlarem West Jaiñtia Hills District.
Ïa ka jingïalang la pynïaid da u Navneet Singh Nagar, DGM, RBI Shillong ha kaba la wan ban ïadonlang naduh ka kong D V Lyngdoh, ADC, West Jaiñtia Hills District, ki Regional Manager SBI, Regional Manager MRB, ki nongtrei ka Directorate of Commerce & Industries, na ka Meghalaya Basin Management Agency, na ki Bank bad ki nongsengkam la jong napoh ka West Jaiñtia Hills District.
U Navneet Singh Nagar, DGM, RBI, Shillong haba ai jingkren ula pdiang sngewbha ïa ki nongwan ïashim bynta da kaba batai bniah shaphang ka jingdonkam ban pynlong ïa ka ‘Town Hall meeting on MSMEs’ ha ki jaka bym don ki Bank, khnang ban ai jingtip ïa kito ki nongseng kam la jong kiba don ha kitei ki thaiñ ba kin tip khambniah halor kumno ban pynïasoh ïa ka kam jong ki bad ki Bank na ka bynta ka jingshngaiñ jong ka rukom treikam ha la liang ka pisa pilaiñ.
Napdeng ki nongïoh jingmyntoi na kane ka Prokram lyngba ka jingïarap jong ka RBI. Ula ong ba kane ka prokram ‘Townhall Meeting’ ka dei kawei na ki lad kaba donkam eh ha kum kine ki jingïalang pynsngew-thuh, ha kaba ki briew jong ka Reserve Bank kin ïoh ban sngap ïa ki jingai jingmut ban pynbha shuh shuh ïa ka kam MSME Entrepreneurs.
Ha kane ka sngi la ïoh ban ïa phylliew jingmut lang ha ki ar bynta ha kaba ïadei shaphang ka Financial service providers bad ka Service recipients (MSME Entrepreneurs).
Katba na ka liang ka kong D V Lyngdoh, ADC, u G Sarma, RM, SBI bad u Deepak Singha Roy, RM, MRB kila ai jingkren lang bad kyntu ïa ki nongseng kam la jong ban shim ïa kane ka kabu.
Ki nongtrei jong ki Banks kila ïoh ban pynsngew sha ki nongwan ïashim bynta shaphang kane ka MSMEs, katba ki nongtrei ka Meghalaya Basin Management Agency kila batai shaphang kiba bun ki bynta ba ka sorkar jylla kaba ïarap ban pynkiew ïa ki kam kiba la jop lyngba ka IVCS Sohphoh, kaba la ithuh mynta kum ka Cluster hapoh ka Sfurti Scheme jong ka sorkar kmie.
Ka kong Trinity Saioo, kaba ïoh ïaka khusnam Padma Shree Awardee kala wan ban ïadon bynta lang bad kala pynshlur ïa ki nongrep ban trei shitom ïa ka kam, da kaba pynkymmaw ïa ka jingthrang jong ka haka kam ban pynïaid ïew ïa u shynrai Lakadong (Turmeric) ha kylleng ka Ri bad shabar ruh kumjuh.
Ha kane ka sngi na ka liang ki nongseng kam la jong kila ïoh ka lad ban pynsngew ïa ki kam ba jop na ka jingtrei shitom jong ki, ha kane ka prokram la sam ruh sha ki katto katne ïa ki Sanction Letters sha ki nongseng kam la jong.
