Pynsngewthuh ka Jingkyrmen SHG sha ki khynnah skul ban kiar na ka shongkha khynnah
Mawkyrwat, ‘Nailur, 17: Ka Jingkyrmen Self Help Groups (SHGs) Rangdkhew lyngba ka jingbei tyngka na ka Chief Minister’s Youth Development Scheme (CMYDS) mynta ka sngi ka 17 tarik u ‘Nailur, 2024 ka la pynlong ïa ka jingai jinghikai kumno ban teh-la-kam na ka jingshongkha khynnah ne Early Marriage ha madan Mawlongoid jong ka shnong Rangdkhew, South West Khasi Hills District, Mawkyrwat.
Ka jingthmu jong kane ka prokram ka long ban pynsngewthuh ha ki khynnah skul ba kim dei ban long kyrkhih ha ka jingwad lok ne jingshongkha namar ka ktah ïa ka jingkoit jingkhiah ïa ka met jong ki bad kumjuh ruh ïa ki khyllung. Kumta ki khynnah skul ki dei ban sngewthuh ba haba ki la ïoh jinghikai kim dei ban shu tip tang ha lade hynrei ki dei ruh ban sam lem sha kiwei ba ka jingshongkha khynnah kam long satai kaba dei.
Shuh shuh ha kane ka sngi la kdew ruh ïa ki daw jong ka shongkha khynnah ba lada ki khynnah skul ki shim noh ïa kata ka bynta kaba pynlong ïa ki ba kin pep skul noh shiteng por, ka jingïakynduh paralok ka dei kawei lada kim pat lah ban teh-la-kam ïa ka jingïaieit, bad lada ki la ïa shong lei lei haba dang lung ka jingmut jingpyrkhat ka jingbymïasngewthuh ka don hapdeng jong ki.
Ym tang kata, ki don ruh ki jingktah lada shongkha khynnah bad kita ki long ka ktah ïa ka koit ka khiah, ka jingmut jingpyrkhat, ka imlang sah lang, ka jingïaphet lok shiteng por, ka jingkit khunrei bad kin ngat ruh ha ka kti jong ka aiñ.
Namarkata, ka kong Mary Geane Shangpliang kaba dei ka ASHA ha ka jingkren jong ka ka la sneng la kraw ïa ki khynnah skul kiba la wan iashimbynta ba da lei lei kin nym long ki briew kiba kyrkih ha ka shongkha shongman hynrei ki dei ban long skhem bad ïaineh da kaba kin buh ka thong ba kin pyndep shwa ïa ki jingpule khnang ba kin lait na ka shongkha khynnah bad haba leit sha ki skul pule ki dei ban long kiba don ka akor ka burom ryngkat ka jingkohnguh ïa ki jinghikai bad ki jingsneng na ki nonghikai bad kumjuh ruh na kiba la san khnang ba ka thong jong ki ban poi sha ki kliar lum jong ka jingjop ha ki jingpule kan sei soh.
Kiba la wan ïashimbynta ha kane ka prokram ki long naduh ki dkhot jong ka Jingkyrmen SHGs, ki khynnah skul jong ka ka Hero Memo LPS & UPS bad ki khynnah skul jong ka Rangdkhiew RCLPS.