Jowai, Jymmang 21: Ka Synjuk Waheh Shnong Ri Jaiñtia mynta ka sngi 21 tarik u Jymmang kila leit ban kynduh ïa u myntri rangbah ka sorkar jylla u Conrad K. Sangma ha CTC Orchid Inn, Thadlaskeiñ ban ïakren ïa ki mat jingdawa kiba ka Synjuk kala angnud ban pyntreikam.
Ha kane ka sngi ki nongïalam shnong ka Synjuk Waheh Shnong ka Ri Jaiñtia kila ïoh lad ban pynsngew halor ka rukom pyntreikam ïa ka skim MGNREGA naduh ka rukom shna ïa ki kynroh bad kumjuh ruh ïa ka skim PMAY (G) na ka bynta ki longïing ba duh hapoh ka District.
Ka synjuk kala dawa na ka sorkar ba kan pyntreikam pynbha ïa ka rukom khaïi pateng hapdeng ka Ri India bad ka Ri Bangladesh. Khamtam ha ka kurom lum khajna na ki mar poh kyndew bad ka rukom shalan ïa ki sha Bangladesh lyngba ka Dawki-Tamabil.
Ka Synjuk ka kyntu jur na ka sorkar ban kan wad ïa ki lad ki lynti katba lah ban pynïoh kam ïa ki khun samla ka thaiñ lyngba kane ka kam da kaba buh sa ar tylli ki Land Custom kum ha Muktapur jong ka West Jaiñtia bad kumjuh ha East Jaiñtia Hills, halor kane u Myntri Rangbah ula kular ban shong bishar bniah ïa kine ki mat jing dawa ba donkam.
