Nongpoh, Jylliew 12: Naba sngewkhia halor ki jingeh ba ki paidbah ki mad ha ka pang ka shitom bad ba donkam ka jaka sumar kaba paka ïa ki paidbah, u MLA ka Mawhati Constituency u Bah Charles Marngar bad ka Synjuk ki Nongïalam Shnong Mawrong Road Ri-bhoi District ha ka sngi Palei ki la leit ban kynduh ïa u Symbud Myntri Rangbah ka jylla, u Bah Prestone Tynsong na ka bynta ban dawa ban kyntiew kyrdan noh ïa ka Health Sub Centre Mawrong sha ka Primary Health Centre.
Ha kane ka jingleit kynduh ha ophis treikam jong u ha Shillong, la ïalam da u MLA u Bah Charles Marngar bad ryngkat ki nongïalam ka Synjuk ki Rangbah Shnong Mawrong Road Ri Bhoi District.
Haba kren sha ki lad pathai khubor, u Bah Charles Marngar u la ong ba ka daw kaba la pynlong ïa u kum u MLA bad ki Nongïalam ka synjuk ban leit kynduh ïa u Symbud Myntri ka dei halor ka nongrim ba ki paidbah ka thaiñ Mawrong ki la donkam da ka jaka ai jingsumar kaba kham paka, namar kumba long haduh mynta ka dang dei tang ka Health Sub Centre kaba la buh jingeh ban ai jingshakri ïa kiba bun paid kiba dang bun ha katei ka thaiñ.
U Bah Charles Marngar u la ong ruh ba ka Mawrong Health Sub-Centre ka ai ka jingshakri haduh 13 tylli ki shnong bad ruh ba ka Umsning CHC ka jngai jingshakri haduh 17 km na Mawrong ba ka la buh jingeh ha ka pang ka shitom bad khamtam ki kynthei kiba armet bad la jin ba la don da ka PHC kane kan ïarap shibun ban pynjanai ïa ka jingshakri na ka bynta kiba pang kiba shitom.
U la ong ba Synjuk ki nongïalam Shnong Mawrong Road ka la pynpaw ba ka kloi ban ai ei ïa ka jaka na ka bynta ban kyntiew kyrdan ïa ka Health Sub Centre Mawrong sha ka Primary Health Centre bad mynta ka shong sa ha ka bor jong ka sorkar ban pynsted ïa ka kam khnang ba ki paidbah kin dup ïoh jingmyntoi da ka jingdon ka Primary Health Centre kaba ai jingshakri haduh 13 tylli ki shnong ha katei ka thaiñ.
U la pynpaw ruh da kaba ong, ba kum u MLA bad ka Synjuk ki dap da ka mynsiem jong ka jingsngewkmen hadien ba na kane ka jingkynduh la ïoh ban aiti ïa ka dorkhas, ha kaba u u Bah Prestone Tynsong u la kular ban shim khia ïa kane ka mat jingdawa kaba long hi ka jingmyntoi ki paidbah ha ka pang ka shitom ha katei ka thaiñ.
