Nongpoh, Naitung, 07: Ban phai khmat lem ïa ki jingeh ba ïa kynduh ki paid khappud hapoh ka thaiñ Block II, ba hap ha ka Raid Nongtung ha Ri Bhoi District, ki nongïalam ka HYNY, Northern Region mynta ka sngi ki la leit ban ïa kynduh ïa u Superintendent of Police ka Ri Bhoi na ka bynta ban ïa kren halor ki jingeh jong ki paidbah ba ki ïa kynduh khamtam ki kam kiba ïa dei ban ioh jingïarap na ka tnad Pulit sha kitei ki shnong khappud.
Kane kane ka jingleit kynduh ka Seng HNYF Northern Region ïa u SP ka Ri Bhoi, u Giri Prasad, ka dei haidien ba ki paid khappud ki la pynsngew ïa ki nongïalam ka seng halor ki jingeh ba ki ïa kynduh ha ki shnong khappud khamtam ha ka por ba ki donkam ïa ki bor pulit na ka bynta ka shongsuk shongsaiñ ha kitei ki shnong khappud.
Haba leit ban ïa kynduh ïa utei u heh pulit ka Ri Bhoi la ïalam ruh da u Assistant Secretary, u bah Edward Thangkhiew ryngkat u General Secretary, u Bah Edelbert Nongrum bad u Vice President ka HNYF Raid Nongtung Circle, u Bah Barnabas Lyngdoh ha kaba ki la ai da ka jingthoh sha u SP ka Ri Bhoi ban kyrpad lem na ka bynta ban pynbiang ïa ki bor pahara sha ki shnong khappud kiba donkam ïa ka jingïada jong ki bor pulit ka Ri Bhoi.
Kumba la ïathuh da u Bah Edward Thangkhiew, Assistant Secretary ka HNYF Northern Region, la ong ba kitei ki shnong kiba la pynpaw jingeh sha ki nongïalam ka seng haba ki donkam ïa ki bor pulit na Ri Bhoi ki kynthup ïa ka Shnoing Khlieh Umwang, Umlaper, Sabuda ba hap ha ka Raid Nongtung bad kumba la pynpaw la ong ba la don bun ki jingujor ejehar ki paidbah na katei ka thaiñ ki bor pulit na Mawlasnai kim ju register case satia.
U la ong ruh kumba la ïathuh ruh da ki paidbah bunsien haba ki leit ban ujor ejehar ha Mawlasnai Police Outpost kim ju lap satia ïa ki Pulit bad dang tang kattto katne ngut bad lada ujor ejeher ruh kim ju register case satia ha kaba kane ka buh jingeh ïa ki paidbah ban ioh kata ka jingïada na ki bor pulit.
Namarkata, kumba la pynpaw da ki paidbah halor ki jingeh jongki, ka seng haba kynduh ïa u SP ka Ri Bhoi, ki la dawa ba un shim khia ïa kane ka kam bad khamtam ban peit ïa ka shongsuk shongsain ki paidbah ha ki shnong khappud bad ruh kum ka seng ka la dawa ruh na ka sorkar ba kan pynkhlaiñ ïa ki bor pulit ha katei ka police outpost khnang ba ki paidbah kin ioh jingmyntoi khamtam ha kano kano ka por ba ki donkam ïa ki bor pulit ban pynlong ïa ki shnong ki thaw ba kin shongsuk shongsaiñ, u la bynrap.
