New Delhi Rymphang 16: U Hardeep Singh Puri, Myntri ka tnad Petroleum and Natural Gas, u la kdew sha ka jingjop jong ka India Energy Week 2025 lyngba ka jingïashim bynta kum bym pat ju ïohi bad ka jingïoh ïa ki teknikal paper. U Myntri u la ong ba kane ka jingïalang ka la long kaba jop da kaba peit ïa ki kam bapher bapher kum ka petroleum, natural gas, ka bording ba khuid, biofuel, bad CBG, ha kaba la pyni ïa ki jingkiew shaphrang jong ki kam.
U Puri u la ban jur ba hapoh lai snem, ka India Energy Week ka la kiew sha ka kyrdan kaba ar hapdeng ki jingïalang ba ïadei bad ka bording, ha kaba ka bynta kaba saw jong ka kan long ha Goa.
U Myntri u la ban jur ba ka IEW 2025 ka la pher na kiwei kiwei ki jingïalang ba ïadei bad ka bording namar ka plié lad ïa ki jingïadie ïathied ha ka jaka ban shu long ka jingïalang ban tei ïa ki jingïadei. U Hardeep Singh Puri u la kdew sha ki jingsaiñdur thymmai kum ka conversion kit kaba jemdor ha ka jaka kyrpang jong ka HPCL, kaba la saiñdur ban plié lad ïa ka jingpyndonkam biofuel na ka bynta ki thuk thuk bad ki kali lai shaka. Shuh shuh, u Myntri u la ong ba u hun ïa ka jingïakynduh ki nongbei tyngka, ki nongshna tiar, bad ki nongthied kaba la kham paw ha ka jingpyni ïa ki kali flex fuel.
Ha kaba ïadei bad ka jingïatreilang ka India bad US ha ki kam bording, u Myntri u la kdew ïa ka jingkiew jong ka jingïadei hapdeng ki ar tylli ki ri, khamtam ha ki kam natural gas. U Myntri u la kdew sha ka thong jong ka India ban kyntiew ïa ka jingpyndonkam ïa ka natural gas sha ka 15% ha ka kam bording jong ka na ka 6% kumba long mynta, bad u la ban jur halor ka jingkongsan jong ka jingïadei bad ka United States na ka bynta ka jingpynbiang ïa ka Liquified Natural Gas (LNG).
Ha kaba ïadei bad ki jingpynkylla ha ki kam Exploration & Production (E&P), u Puri u la kren shaphang ka jingïar jong ka Open Acreage Licensing Program (OALP) Round X kaba peit ïa kumba 200,000 square kilometer. U Myntri u la batai ba ka jingkiew ka jingkhring jong kane ka bynta ka wan na ki jingkylla ha ka rukom pynïaid ïa ka kam, ka jingkylla na ka jingpynmih sha ka jingïasam lang ïa ki jingïohnong, ha ryngkat ki jingpynkylla ba la thmu ban wanrah ha ka Oilfields (Regulation and Development) Act 1948.
Shuh shuh, u Puri u la pynbna ba ka kam kaba thymmai kaba ïadei bad ka aiñ, kaba la wanrah lyngba ki jingïamir jingmut, ka dei ka ban sa wanrah ha ka Lok Sabha. U la kren shaphang ka jingïatreilang jong ka ONGC bad ka BP, bad ka jingtyrwa ka Reliance ïa ki block ha ki bynta ba la dep kiba long ka nuksa kaba khlaiñ jong ka jingïatreilang.
Ha ka jingbatai shaphang ki kam ba kongsan jong ka tnad, u Myntri u la ban jur halor ka jingpeit bniah ïa ka E&P, da kaba ban jur halor ka jingïatreilang bad kiba la tbit ha ka kam bad u la ai jingmut ban pynkylla ïa ka rukom pynïaid ïa ka kam kaba plié lad ban ai jingsiew kaba biang ïa kiba don bynta ha ka kam haba lap ïa ki jingdon jingem.
U Myntri u la kdew sha ka jingdonkam jong ki jingpynkylla ba la ai jingmynjur da ka Rajya Sabha, ban pynthikna ïa ka jingsngewthuh lypa ïa ki polisi, khamtam ha kaba ïadei bad ka jingpyntreikam ïa ka jinglum khajna. U la ban jur ba ka jingweng ïa ki bynta bapher bapher na ka jingpyntreikam polisi ka dei na ka bynta ka jingshai jong ka rukom synshar ïa ka kam bording.
Ha kaba ïadei bad ka jinglong jingman jong ka kam bording ha ka pyrthei, u Myntri u la ong ba ka jingñiewkor ka bor synshar kaba thymmai ha US ïa ka jingkyntiew ïa ka jingpynbiang umphniang ka la wanrah ïa ka jinglong jingman kaba plié lad ha ki ïew jong ka pyrthei. U la ong ba ka jingmih ki tyllong umphniang ba thymmai ha ka thaiñ sepngi jong ka pyrthei ba kynthup ka Brazil, Argentina, Suriname, Canada, US bad Guyana ka dei kaba ai jingmyntoi ïa ki ri kiba pyndonkam umphniang kum ka India. U Puri u la ong ba u ngeit skhem ha ki jingbei tyngka ka India ha ki jingdon jingem kiba ïadei bad ka umphniang bad ka gas ha kiwei kiwei ki ri kum ka Brazil, Venezuela, Russia bad Mozambique.
U Hardeep Singh Puri u la ong ba ka biofuel program ka dei ka prokram kaba seisoh bha, da kaba kdew sha ka jinglah ban khleh ethanol haduh 1,700 klur liter, bad u la kren shaphang ka thong ban khleh 20%. Shuh shuh, u Puri u la ong ba u khmih lynti shaphang ka green hydrogen, da kaba kdew sha ka jingïaid sha ka jinglah pynmih 5MMT ha ka shi snem shuwa u 2030, bad u la kren ruh shaphang ka jingkiew shaphrang ka kam kaba ïaineh kaba ïadei bad ka aviation fuel.
U Secretary ka tnad Petroleum and Natural Gas, Pankaj Jain u la batai shaphang ki jingdie jingthied ha ka IEW 2025 ha ki kam bapher bapher. U la ong ba kine ki don ha ki thup bapher bapher: ki jingpynbeit ban pynbiang umphning bym pat pynkhuid, LNG, bad LPG ha ki thaiñ bapher bapher, ki jingïatreilang ha ka teknoloji ban pynbeit ïa ki kam digital ha ki jaka pynkhuid umphniang; bad ki jingai jingshakri ban wad ïa ki jingdon jingem.
U Pankaj Jain u la kren ruh shaphang ka jingïar jong ka OALP Round X, da kaba ban jur halor ka jingdonkam ïa ka jingpyndonkam na kylleng ka pyrthei ïa ki jingdon jingem hydrocarbon ha ka ri. U Jain u la kren ruh shaphang ka lad ban pyndonkam ïa ka Oil Industry Development Fund, kaba la pynbiang hapoh ka Oil Industry Development Act, na ka bynta ka jingpynbiang pisa ïa ki jingwad ha ki jaka duriaw ba jylliew.
Ka jingpynkupbor ïa ki nongjop ka jingïakhun ki Startup bad ka Hackathon:
Ïa ki khusnam Avinya’25 – Energy Startup Challenge, ka sienjam kaba kyrpang jong ka tnad Petroleum and Natural Gas, la sam da u Hardeep Singh Puri bad u Pankaj Jai. Ka Avinya’25 ka ai jingithuh ïa ki startup kiba don ki jingpynbeit ba prat lynti na ka bynta ki jingeh kiba ïadei bad ka bording.
Ka Urjanova C Pvt Ltd ka la jop na ka bynta ka synthetic catalyst technology jong ka kaba pynthikna ïa ka jinglah lum bad pynkylla CO2 kaba lah ban pynïar bad kaba jemdor. Ka Breathe ESG Private Limited kaba wan ba ar ka la sdang ïa ka rynsan SaaS kaba pynïaid ryntih ïa ka jingai jingtip ESG, ki lad pynduna ïa ka jingpynmih carbon, bad ki kyndon ba hap ban bud.
