Pynshisha ïa ki jingkynnoh hakhmat ki paidbah ha Nongpoh, dawa ka BJP na u Rahul Gandhi

Shillong Kyllalyngkot 23: Ka BJP Meghalaya mynta ka Sngi Ba ar, ka la ther pyrshah ïa u nongïalam ka seng Congress u Rahul Gandhi bad ong ba ki jingkren ki jong u ki dap da ki jingshukor jingpynbeij bad dawa ba u dei ban pynshisha ïa ki jingkynnoh jong u ha ka jingïalang paidbah ha Nongpoh kaba la long ha ka Lah Sngi U Blei 22 tarik Kyllalyngkot 2024.
“Ngi kylli ïa u Rahul Gandhi ban pynshai ha kano ka dur ba ka jinglong, ka history, ka rukom im rukom sah ki nong meghalaya ki shah thombor, ka BJP ka lah ban pynshai ïa ki kam kiba ka la leh naduh tynrai ha ki rukom bapher bapher lyngba ki morcha ka party ban kumno kin lah ban ïarap ïa ka imlang ka sahlang bad ban kiew ki paid Meghalaya, ym dei ba ngi kawang ktieh ïa ka party Congress kaba lah synshar ïa ka ri jong ngi kumba 40 snem eiei” la ong u Sabyasachi Ghose, Convenor ka State Media Cell BJP, Meghalaya Pradesh.
Ula pynpaw ruh ba ka BJP ka kdew ruh ruh ba ki nongkitkam ka party ka bun hapdeng ki trai muluk ka ri, ha ki district bapher bapher na sor shaduh nongkyndong ki dang ïa kiew katba dang mih ki sngi, ka jingkylli ka long lada ka BJP ka dang pyntroiñ ïa ki rukom im rukom sah ki paid Meghalaya kumno ki paid naduh na sor bad na kyndong ka Meghalaya ki wan ïasnohlang bad ka BJP bad lada ngi leh sniew ki nongkitkam jong ngi kin duh jait kum ki nongkitkam ka Congress.
“Ban shu pynkynmaw ruh ïa u Rahul Gandhi ba iwei pa iwei ki riewshlur jong ka Meghalaya ki ïoh ïa ka jingpynkup burom bad jingkynmaw na ki paidbah, ban shu kren noh, ngim kynmaw ba ka congress ka lah ju trei kumta. U Rahul Gandhi u lah kren ba ki Khasi bad ki Garo kim don ha ka Eighth Schedule tangba u klet pat ïa ki nong Jaintia, tang hangne u lah pynshai ba ym pat tip bha shaphang ki tynrai ki nong meghalaya. Ka BJP ka kwah ruh ban tip bad ban kylli ba ka congress ka lah leh aiu ha ki 60 snem ba lah dep ha ka por ba ki dang don ha ka bor synshar ka jongki ha ka ri India baroh kawei bad ha ki shnong ki thaw, balei U Rahul um pynmih ïa kita ki kyntien ha ka por ba u dang don ha ka bor, hynrei tang ki jingkylli bym don nongrim” ” ong Sabyasachi Ghose.
Ka BJP ka la ong ruh, “Ha kaba ïadei bad ka jingkren shaphang ka jylla Manipur, u Rahul u pynsngew kumba ka jingïakhih ka Manipur dei naduh ba synshar ka BJP, hynrei u klet ba ka ïing ka sem jong u kam pat tip ne wan bha shane sha North East jong ngi ne shim kabu ban ïarap. Ngi kiba dei ki nongshane ngi tip bha ba ka Congress ka khlem pynmih lad ban pynbha ne pynïasuk ïa ka jingïadei shane. Ha kato ka por ngim dei ban klet ba ka Congress ka don ha ka bor ha kasorkar pdeng bad ha Manipur hynrei lehnoh ei ba khlem don jingïarap na ka seng ba synshar ha kato ka por, phi lah klet ïa kata Rahul Gandhi?.
Ula ong ba mynta, lada ka BJP ka wanrah ki lad jingsuk bad ban pynjem ïa ka jingjia ha Manipur u Rahul Gandhi u wan ai ding pynban tangba kine ki dei ki rukom trei ka Congress naduh mynshuwa.
Ka BJP kala pynkynmaw ruh ïa u Rahul Gandhi ba ka jingleh donbor dei ka policy jong ka Congress bad ki nongpynïaid ba hiar pateng kumjuh, hynrei ka BJP ka ngeit skhem ba ka jingïatrei bad ka jingïadei jongka sorkar pdeng bad ka sorkar jylla hi kumjuh ka lah wanrah jingphuh ha ki rukom treikam bapher bapher ha kane ka North East hi baroh kawei.