Nongstoiñ, Nailar, 27: Ka District Legal Services Authority (DLSA) West Khasi Hills District Nongstoiñ, ka la pynlong ïa ka Legal Awareness Programme na ka bynta ki Chemists, Druggists bad ki Pharmacists ha Conference Hall Ophis jong ka District & Sessions Court, Nongstoiñ, kum shibynta jong ka NALSA Dawn Campaign.
La sdang ïa kane ka prokram da ka jingkren pdiang na ka kong D.M.K.S. Shadap, Chief Judicial Magistrate-cum-Secretary ka DLSA, ha kaba ka la ban jur ïa ki jingeh kiba nang kiew ha kaba ïadei bad ka jingpyndonkam bakla ïa u drok ha ka imlang sahlang. Ka la pynpaw ïa ka bynta kaba kongsan kaba ki nongdie dawai, ki lah ban leh khnang ban weng ïa kane ka jingeh.
Watla ki im jakpoh na kane ka kam die dawai pynban ka la pynkynmaw ba ki dei ruh ban pynthikna ba ïa ki dawai la ai da ka jingkitkhlieh bad bud thik katkum ki slip dawai ba la ai da ki Doctor. Ka khot ruh ban husiar, khamtam ha ki khep ba ki nongthied ki dawa biang biang ïa kijuh ki dawai khlem da ïoh jingmut na ki doctor, haba pynpaw ba kam dei shuh ka jingpang hynrei ba ki la kyrni ha uta u jait dawai.
Ka la kyntu ïa baroh ki nongdie dawai ban buh ïa ki jingthoh kiba biang, ban pynmih ïa ki bill na ka bynta man la ka jingkhaïi, ban pyntip kloi ïa kino kino ki jingleh kiba suba bad lada ki nongdie dawai ki mad ïa ki jingbyrngem, jingpyntieng, lane jingpynbor na ki nongthied, kim dei ban sngap jar hynrei ki dei ban pyntip mardor sha ka tnat pulit lyngba u 112 Emergency Helpline Number, uba treikam 24/7.
Katba ka Kong Y.Biam, Inspector of Drugs, West Khasi Hills District, haba ai jingkren ha kane ka sngi, ka la pynpaw ïa ka jingkitkhlieh jong ki nongdie dawai ha kaba pynthikna ba ïa ki dawai la die katkum ki jingbtah bad ïaid ryngkat bad ki kyndon jong ka aiñ.
Ka la kyntu ïa ki ban kiar na ka jingdie ïa ki dawai kiba la kut por, ban pynïaid beit ïa ka stock namar ki don ki kyndon kiba lada ïaid lait wat ki nogdie dawai ruh kin ngat ha ki jingpynsaja jong ka aiñ.
Katba na liang ka tnat pulit la wan mihkhmat da u SI B. Talang u ba la kren halor ka (NDPS Act, 1985). U la batai ïa ki kyndon ba kongsan jong ka aiñ, ki jingpynshitom na ka bynta kiba pynkheiñ bad ka bynta ba kongsan jong ki nongdie dawai ha kaba khanglad ïa ka jingpynphriang ïa ki dawai kiba la khang ne pyndonkam bakla.
U la maham shuh shuh ba ka jingbym shimkhia ne ka jingpynkheiñ kaba thmu ka lah ban wanrah ïa ki jingma kiba khraw kynthup ïa ka jingpyndam ïa ki laisen, ka jingpynngat ïa ki kuna kiba heh, bad wat ka jingshah set phatok.
Ha kane ka prokram la sakhi ïa ka jingïashim bynta kaba radbah na ki nongdie dawai, ki druggists, ki pharmacists bad ki pulit na kylleng ka district. Ha ka jingïakren, ki nongïashim bynta ki la pynpaw ïa ki jingeh kiba ki ïakynduh ha kaba ïadei bad ki nongthied kiba dawa dawai khlem da prescription. Ki heh sorkar ki la pynthikna ïa ki ba kin bteng ban ïalam bad ïatreilang ban weng ïa kum kine ki jingeh.
Ka thong kaba kongsan eh jong kane ka prokram ka long ban pynkynmaw ba ki nongdie dawai ki don la ka bynta kaba khraw na ka bynta ban ïada ïa ka imlang ka sahlang na ki jingkiew sted shuh shuh jong ka jingkyrni dih drok, u kynsha u ba la pynjot ïa ka imlang ka sahlang.
Bunsien haba ong drok bunsien ngi khmih lynti beit tang ïa ki drok kiba long beaiñ, hynrei ki don pat ki drok kiba long aiñ kum ki dawai jyrhoh, bad kiwei kiwei kiba la shna ban pynjem ïa ki jingpang kiba bun. Hynrei, lada pyndonkam palat ïa ka dose kaba la buh kita ki jait dawai ruh, ki kylla long ki jingdih pynbuaid bad ki pynkyrni, bad ïa kine ki dawai, la ïoh tang na ki jaka die dawai, ha kaba ki nongdie dawai ki don ïa ka bynta kaba khraw ban ïada ïa kane ym tang ban kamai spah bad ban ym tip shuh ïa ka hok bad ka jingshisha.
La pynkut ïa ka prokram da ka khubor kaba khlaiñ jong ka jingkitkhlieh lang ha kaba ïada ïa ka imlang sahlang na ka jingdih drok. Ka DLSA ka la pynskhem biang ïa ka jingangnud jong ka ban pynïaid shakhmat ïa kum kine ki prokram pynsngewthuh, ki jingthmu ai jinghikai bad ka jingïatreilang bad ki bor pynjari aiñ ban pynthikna ïa ka West Khasi Hills District kaba koit ba khiah bad kaba shngaiñ.
