Shillong, (PIB): Ki la don ki khubor ba la mih kiba kam ba u Comptroller and Auditor General of India (CAG) u la pyni ba la book ïa ki jingsumar na ka bynta ka jingai jingsumar ïa ki briew kiba ïoh jingmyntoi na ka AB PM-JAY kiba la pynbna ba la khlad. Ki kaiphod ki la kam shuh shuh ba la lap ïa ujuh u nongioh jingmyntoi uba shah sumar ha artylli ki hospital ha kajuh ka por. Kine ki khubor kilong kiba ïalam bakla bad ki bym don nongrim.
Ka kaiphod jong u Comptroller and Auditor General of India kiba don ïa ki jingshem jong ka Performance Audit halor ka Ayushman Bharat Pradhan Mantri – Jan Arogya Yojana (AB PM-JAY) kynthup naduh ka samoi jong u Nailur 2018 haduh Lber 2021 la wanrah hakhmat ka ïing dorbar parliament ha ka dorbar Lyiur jong u 2023.
La pynshai ba hapoh ka AB PM-JAY, la shah ïa ki hospital ban sdang ka jingkyrpad ban ai jingbit lypa na ka bynta lai sngi, shuwa ka tarik ban rung shah sumar ha hospital. Ïa kane ka bynta la ailad ban lait na ka jingkyntait ban ai jingsumar haba don ki jingeh ha ki lad jingïakren, ki jingdonkam kyrkieh bad kiwei kiwei.
Ha ki katto katne ki case, ki nongpang ki leit sha hospital bad hashuwa ban ioh lypa ïa ka jingai jingbit, ki khlad noh hapdeng ka jingshah sumar. Ha kum kine ki case, ka tarik jong ka jingkhlad kalong kajuh bad ka tarik ba rung shah sumar ha hospital lane kham hashuwa. Shuh shuh, la ïoh jingtip shaphang ka jingkhlad na kajuh ka hospital kaba la pan lypa ïa ka jingbit. Kumta, lada ka hospital ka pyrshang ban thok, kan nym pyni kano kano ka jingpynbna shaphang ka jingkhlad u nongpang ha ka IT system.
Kalong kaba donkam ban kdew ba palat 50% ki case ba pyni ha ka kaiphod kidei kiba la book da ki hospital sorkar, ki bym ïoh jingmyntoi ban leh ïa ki kam thok pisa, namar ïa ka pisa la siew biang sha ka account jong ka hospital. Shuh shuh, lada don ka jingkhlad ha ka por shah sumar, ka hospital ka hap ban ai ia ka kaiphod jong ka jingkhlad.
Ki don ruh shibun ki jingjia ha kaba ki nongpang ki leit shah sumar ha hospital kum ki riew shimet (ba lut nalade) hynrei haba ki tip shaphang ka skhim bad ki kyndon hapoh ka skhim, ki nongpang ki kyrpad ia ka hospital ban pynrung kyrteng ia ki hapoh ka skhim ban ïoh ïa ka jingsumar ei. Kane ka bynta ban kyrpad ïa ka jingai jingbit lypa hadien ka por ka ïarap ban tyngkai ïa ka jinglut jingsep jong kiba ïoh jingmyntoi.
Ha kaba ïadei bad ujuh u nongpang uba ïoh jingsumar ha ki artylli ki hospital ha kajuh ka por, lah ban ong ba hapoh ka AB PM-JAY, ki khynnah haduh 5 snem ka rta ki ïoh jingsumar lyngba ka Ayushman Card jong ki kmie ki kpa. Kumta, ïa ka Ayushman Card lah ban pyndonkam na ka bynta ki khynnah bad ki kmie ki kpa ha ki artylli ki hospital. Ka nuksa, ka kmie ka leit shah sumar ha kawei ka hospital bad ka kha ïa i khunlung ha ka por jong ka jingshah sumar bad ka hospital kaba ka kmie ka ïoh jingsumar kam don ïa ki lad ai jingsumar ia ki khunlung, kumta la pynkit noh ïa i khunlung sha kawei pat ka hospital ba don ki lad ai jingsumar na ka bynta ki khunlung. Ha kane ka case, la pyndonkam ïa ka Ayushman Card jong ka kmie na ka bynta baroh arngut, ka kmie bad i khunlung. Sa kawei pat ka nuksa ka lah ban long ba u kpa bad i khunlung ki ïoh jingsumar ha artylli ki hospital bapher bapher lyngba ka Ayushman Card jong u kpa.
Bunsien, ka kmie bad i khunlung ki ïoh jingsumar da kaba pyndonkam tang kawei ka Ayushman Card, bad lada i khunlung i khlad noh ha ka por shah sumar, ka hospital ka pynbna ïa ka jingkhlad i khunlung kaba rung bakla pat ha ka card jong ka kmie. Kumta, haba ka kmie ka leit shah sumar biang hadien, kam ïoh ïa kine ki jingshakri namar la buh dak ïa ka Ayushman Card jong ka kum kaba la khlad. Ha kum kine ki case, la pynpaw ïa ki jingsngewkhia, bad la weng ïa ka jingbuh dak ïap ha ka card jong ka kmie.
Kalong kaba kongsan ban kdew ba ka don ka rukom treikam kaba saw bynta ban pan jingpynphai pisa hapoh ka AB PM-JAY. Ha man ka sienjam la peit bniah ïa ki jingkam jong ka hospital. Shuh shuh, ki don ki bynta kiba pyntreikam ha ki jingpan pynphai pisa ban lap ïa ki case ba donkam shuh shuh ka jingpeit bniah. Kum kine ki case ki hap ha ka audit. Lada lap ba ka hospital ka donkti ban leh ïa kine ki kam beain, ki don ki jingpynshitom kum ka jingweng kyrteng pyrshah ïa ka hospital.
Ka jinglap jong ka CAG ba kadon kawei ka mobile number ba don jingiadei bad bun ki nongïoh jingmyntoi kam treikam bad kam ktah ïa ki kam pisa namar ka kam ban ithuh ïa u nongïoh jingmyntoi hapoh ka Ayushman Bharat PM-JAY kam don bynta bad u mobile number. La shim ïa u mobile number tang na ka bynta ban poi sha ki nongïoh jingmyntoi lada donkam bad ban shim ïa ka jingsngew jong ki shaphang ka jingsumar ba ki ïoh.
Ka Ayushman Bharat PM-JAY ka ithuh ia kiba ioh jingmyntoi lyngba u Aadhaar ha kaba u nongioh jingmyntoi u hap ban leh ia ka Aadhaar katkum ka e-KYC. Ki jingtip ba ïoh na ka Aadhaar database ki iasyriem bad ka tyllong jong ka database bad kumta, ka jingkyrpad na ka bynta ka Ayushman card la pdiang lane kyntait katkum ki jingtip ba iadei bad u nongioh jingmyntoi. Kumta, ki mobile number kim don bynta ha ka kam pynshisha.
Shuh shuh, kalong kaba donkam ban kdew ba ka AB PM-JAY ka peit ïa ki nongïoh jingmyntoi (kiba 40% shapoh) ha kaba bun na ki kim don ïa u mobile number lane u mobile number uba kylla man ka por. Kumta, ka NHA ka buh lai tylli kiwei ki lad kata ka dak shympriah kti, ka dak khmat bad ka jingpynshisha lyngba ka dur khmat na ka bynta ka jingpynshisha ia kiba ioh jingmyntoi ryngkat bad u OTP, ha kaba la kham pyndonkam bha ïa ka jingpynshisha katkum ka dak shympriah kti.
Ha kaba ïadei bad kitei kiba la kdew haneng, ym lah ban pynsangeh ïa ka jingsumar ia kiba dei ïoh jingmyntoi tang namar ba u nongïoh jingmyntoi um don ïa u mobile number ba treikam, lane u mobile number kaba ki ai u la kylla. Kumta, ki mobile number jong ki nongïoh jingmyntoi kim da don bynta eh ha ka kam ai jingsumar hapoh ka AB PM-JAY. Kumjuh ruh, ka PM-JAY kadei ka skhim kaba ai jingmyntoi katkum ki jingdonkam bad ym ka skhim kaba pynrung kyrteng kumta, ka database jong kiba ïoh jingmyntoi ka dei kaba skhem bad ym lah ban pynkylla ban pynrung shuh shuh ia ki nongioh jingmyntoi ba thymmai. Ki mobile number kim don bynta ban rai ia ka jingbit jingbiang jong kiba dei ioh jingmyntoi. Kumta kalong kaba bakla ba kiba dei ïoh jingmyntoi ki ïoh jingsumar da kaba pyndonkam ïa u mobile number.
Ha kaba ïadei bad ka jingpyndonkam ïa ujuh u mobile number da bun ki nongïoh jingmyntoi, lah ban ong ba u mobile number um long kongsan ban pynshisha ïa kiba dei ioh jingmyntoi. Hynrei, namar ka don ka lad ban shim ia ki mobile number, kumta la pynrung ïa ki mobile number da ki nongtrei ha ki katto katne ki case ha ki por ba dang sdang jong ka jingpyntreikam ïa ka skhim. Nyngkong, ym shym la pyntreikam ia ka jingpynshisha katkum u OPT namar bun ki briew kim rah ïa ki mobile phone bad ki lane ki ai lang da u number jong kiba haïing lane ki paramarjan jong ki. Hynrei, ka jingbym pynshisha ïa ki mobile number kam ktah ïa ka kam pynshisha ïa kiba dei ban ioh jingmyntoi lane ka jingshisha jong ki briew kiba dei ban ïoh ïa ka skhim.
La don ka jingpynkylla ha ka rynsan IT ba pyndonkam da ka NHA na ka bynta ban ïoh tang ïa ki mobile number ba treikam, lada u nongïoh jingmyntoi u don ïa kane.
Ka National Health Authority bad ka Tnat ka koit ka khiah jong ka sorkar pdeng ki dang peit bniah ïa ki jingai jingmut jong ka kaiphod performance audit jong ka CAG bad la shim ia ka sienjam ba donkam ban pynkhlaiñ ïa ka rukom treikam, pynïaid kham ryntih ïa ka da kaba pynkhlain ïa ka rynsan IT bad ki rukom treikam kiba don lypa.
