Nongpoh, Naitung 19: Ka Dorbar Raid Nongkhrah ha Ri Bhoi District mynta ka sngi ka la mih shakhmat ban pynshai paidbah halor ka jingthung ïa u Lyngdoh bad ki Longsan ki mansan hapoh ka Raid Nongkhrah bad na ka liang ka Dorbar Raid Nongkhrah ka la kynnoh ba ïa kitei ki kam la shuh leh marwei tang da U Bah Rodney Syngkli khlem ka jingtip lang ki san kur san kpoh hapoh ka Raid Nongkhrah.
Kane ka jingmih ka Dorbar Raid Nongkhrah ban pynshai paidbah halor ki kam raid, ka dei hadien ba la kynnoh ba u Bah Rodney Syngkli, khlem ka jingtip lang ka San kur san kpoh jong ka Raid Nongkhrah, u la leh marwei ïa ka kam da kaba wan khang ïa ka Dorbar Hall ka Raid Nongkhrah ha ka 1 tarik u Kyllalyngkot 2024 bad nangta la kynnoh ba ka Kur Syngkli bad ka JAC ki la weng ïa ki longsan barim ba kynthup naduh u Lassing Lyngdoh kum u Lyngdoh ka Raid Nongkhrah, u Phis Narlong kum u kongsan ka Raid Nongkhrah bad u Bilson Nongkuom kum u Doloi.
La ong ruh hadien ba la weng ïa kitei ki longsan mansan ka Raid Nongkhrah, katkum ka ka shithi ba la lap ha ka 19 tarik u Naitung 2024, u la thung thymmai ïa ki longsan ki masan, haka ba la thung Lyngdoh thymmai ïa u Bah Bob Lyngdoh, kongsan ïa u Bah Mathias Thangkhiew, ba ka Kur Thangkhiew kam dei ka kur kaba don bynta ha kam synshar khadar hapoh ka Raid bad ïa u Doloi la thung ïa u Bah Jril Nongkoum, ha kaba ïa kam la leh marwei da u Bah Rodney Syngkli khlem da don ka jingtip da ka Dorbar Raid bad ruh ka san kur san kpoh kiba don bynta ha kaba jied ne thung ïa ki Longsan ki mansan jong ka Raid Nongkhrah.
La kynnoh ruh ha katei ka jingjied ïa kitei ki longsan ki mansan, kitei ki longsan mansan ruh kim don satia ha katei ka sngi bad la shu leh marwei da u Bah Rodney Syngkli.
Ki longsan mansan ka Raid ba kynthup naduh u Bah Phis Narlong kum u kongsan ka Raid, u Bah Donboklang Lyngdoh khynnah ka Raid, u Bah Gilbert Syngkli kum u Pator, u Bah Mos Lyngdoh kum u Lyngdoh khynnah bad u Bah Bob Lyngdoh, ba la shah jied kum u Lyngdoh thymmai, ki la kynnoh bai a kine ki kam ban thung longsan mansan ha ka Raid la shu leh marwei tang da u Bah Rodney Syngkli khlem ka jingtip ka Dorbar Raid bad ruh ka san kur ka san kpoh hapoh ka Raid.
Kitei ki longsan ki mansa ki la kyrpad ïa ka Elaka Nongpoh Sirdarship bad ruh ïa ka KHADC ba kim dei ban pdiang ïa kita ki longsan ki mansan ka Raid, kaba la shu leh marwei tang da u Bah Rodney Syngnkli bad shuwa ba kin ithuh ïa kane ka kynhun ba la ïalam da u Bah Rodney ki dei ban wad shwa ïa ka jingtip kaba bniah kiba dei katkum ka riti ka dustur jong ka Raid Nongkhrah.
