Khliehriat, Jymmang 17: Katkum ka jingkam jong u bah Phermiki Salahe, uba dei uwei na ki nongsiat khnam uba iashim bynta ha kane ka Meghalaya Game, u la ong ba u khlem ioh kano kano ka jingiarap na ka Kyrmen Foundation kumba la pynpaw u bah Kyrmen Shylla ha ki facebook page pat la ong ba ka Kyrmen Foundation ka la theh jingiarap sha une u nongsiat khnam uba na Dkhiah West East Jaiñtia Hills District.
Katkum u kyrwoh ba la ioh na ka Kyrmen Foundation la pynpaw ba “Katkum ki khubor ba la mih ha kine ki sngi kaba dei shaphang u bah Phermeki Salahe, ka la pynpaw iya ka dur jong ka Foundation ha ka rukom ka bym itynnad, lyngba ki khubor bun kiba la kynthoh ym tang ïa ki dkhot jong ka Foundation hynrei la kynthoh ruh ïa u MLA jong ka Khliehriat Constituency, u bah Kyrmen Shylla. La bun ki message kiba ngi la iohi ha ki social media kiba la jingkylli ïa ka jingshisha halor ka jingtreikam jong ka Kyrmen Foundation, kumta na kane ka daw kum ka Foundation ngi kwah ban pyllait ïa ka jingpynshai shaphang kane ka jingjia” ong u kyrwoh.
“Ngi la ioh ki jingtip lane ki reference shaphang uwei u khynnah kiba iathuh shaphang u bah Phermeki Salahe bad ong ba dei u khynnah ialehkai siat khnam uba tbit bad ka shnong jong u ka dei na Dkhiah West, East Jaiñtia Hills, kumta ngi la pyrshang ban contact ïa u bad phah wan ïa u sha ophis. Bad ngi la iakynduh ïa u bah Phermeki Salahe ha ka 9 tarik u bnai Iaiong, 2022 ha ka ophis treikam jong ngi ha Lad Rymbai bad ki dkhot jong ka Foundation ki la sngap ïa ki jingjynjar ba la shem da une u samla bad u la iathuh ruh ba u don jingmut ban iehnoh shwa shipor ïa kane ka jingialehkai siat khnam namar um don tiar”
“Na ka liang ka Secretary, Kyrmen Foundation, ka kong Simi Khongthiang ka la iathuh ba na ka liang ka Kyrmen Foundation ki la rai ban ai jingiarap ïa u bah Phermiki salahe khnang ba un dup lah ban iaid shakhmat ha ka jingialehkai jong u, ka Secretary ka la bthah ruh ïa u ba un iathuh shwa ha iïng ïa kane ka jingtyrwa jong ka Kyrmen Foundation bad hadien la ai ka ïa ka rai ban iaid shakhmat bad ban pdiang ïa kane ka tyrwa ai jingiarap”.
“Kumta ha ka 16 tarik jong u Iaiong, 2022, utei u samla Phermeki Salahe, u la kynduh ïa u President jong ka Kyrmen Foundation bad u President u la ai ktien ïa bah Phermiki ba ka Foundation kan iarap yia u da kaba ai ïa ki tiar ialehkai, ka pisa ba T5000/- tyngka man la u bnai na ka bynta 3 snem lem bad ka scooty ban pynsuk ïa ka leit ka wan jong u bad ruh ïa ka madan ba u lah ban practice. U Phermeki u la pdiang ïa kane ka jingtyrwa ka Foundation, hynrei ïa ka jingpynbit pynbiang ne ka agreement naka bynta jong kane la mut ban ïa soi ynda la wanphai u President na ka jingsumar ïa i ba haiing jong u na Bangalore”.
“Ha u 5 tarik jong u Jymmang hadien ba ka Foundation ka la tip shaphang ka jingialehkai jong u samla Phermiki ha Meghalaya Games, ki dkhot ki la iakren ïa u shaphang ki post ban buh ha social media. La phah ruh ïa kane ka post sha u bah Phermeki naka bynta ka jing mynjur ka jong u bad ruh u la ai dak ‘like’ ïa kane ka post ha ka Facebook, kumta kane ka post ka long katkum ka jing mynjur jong u Phermeki Salahe ïa ka jingiarap na ka Foundation”.
Na ka liang ka Foundation ka la pynshai shuh shuh ba “hadien kane ha ka 8 tarik jong u Jymmang, ka Fooundation ka la ioh ka jingtip ba i hymmen jong u Phermeki i kwah ban kynduh ïa ki dkhot ban kren shaphang kata ka post bad namar ka jingsngewthut hapdeng ka jingiakren, la record ïa ka jingiakren hapdeng jong ki. Ha kane ka jingiakren na baroh arliang ngi la mynjur ban pynshai shaphang kane ka post ba la pynmih, hynrei, ha ka sngi ba bud pat u bah Phermeki u la ong iangi ban delete noh ïa kane ka post ha ka jaka ban pynshai shaphang jong ka, kumta ha ka 9 tarik Jymmang ngi la pyndam noh ïa baroh ki post kiba iadei bad kane. Ka Foundation ka la dep kren ïa u Phermeki hi naduh nyngkong kumta ngi la sngap ïa ka jingkwah ka jong u hi bad leh ïa kaei ba u la ong ia ngi:
“Hadien jong kane ngi la ioh jingtip shuh shuh ba i hymmen jong u Phermeki i la leit ban buh da ka ejahar pyrshah ïa ka Foundation ha kaba iadei bad kane ka post ha ka 12 tarik jong u Jymmang, 2022 bad ngi ki dkhot ngi la shah summon ha Police Station ha ka 13 tarik Jymmang, 2022 bad ha kane ka jingiakynduh la rai ba ki dkhot kin kynduh ïa u samla Phermiki markhmat ha ka 16 tarik u Jymmang ha Police Station, hynrei ha ka sngi hashwa ka jingiakynduh, kata ka 15 tarik ka la mih ka video jong u bah Phermeki ha ki channel khubor”
La ong ruh ba baroh kumba la dep batai ki dei kiba shisha bad ka Foundation ka don ruh ïa ki sakhi sabut ban kyrshan ïa kine ki jingong.
“Na ka liang jong ka Foundation ngi kwah ban pan map na u samla Phermeki Salahe bad na ki ba haiing hasem jong u na ka bynta kano kano ka jingbakla bad ka jingpynsngewsih ka jong ngi ïa ki, ha ka jingshisha ngi la iohi ïa ka jingtbit ka jong u Phermeki ha ka jingialehkai ka jong i bad kumta ngi la kwah ban iarap ïa u ba un lah ban ialeh haduh ban da poi sha ka thong bad ka jingthmu bad ka jong ka post jong ngi ha Facebook kam dei ban pynjah burom ïa u samla Phermeki hynrei ban ai mynsiem ïa kiwei pat ki nongialehkai ban mih sha khmat bad kum ka Foundation, ka thong ka jong ngi ka long ban iarap bad ai ka jingkyrshan ïa kito ba donkam ka jingiarap, ka Foundation ka la rai ban kyrshan ïa u samla Phermiki Salahe bad mynta ruh ngi ieng ha kata ka juh hi ka nongrim bad ngi kloi ban iarap ïa u bah Phermiki Salahe kumba ngi la dep kular” Pynkut u kyrwoh na ka Kyrmen Foundation.
