Shillong, Naitung, 25: Hashuwa ka jingdap lai snem ka National Education Policy, 2020 ha ka 29 tarik mynta u bnai ka Indian Institute of Management (IIM) Shillong ka la pynshai halor ka jingpyntreikam ïa ka NEP 2020 ha ka jingïalang ba la ïashim bynta lang da ki nongmihkhmat na ka NIT Shillong bad NEHU Shillong kynthup ruh u Director jong ka Regional Directorate of Skill Development and Entrepreneurship (RDSDE).
Ha kane ka sngi, la pynbna ba u Myntri Rangbahduh ka ri u Narendra Modi un sa plié paidbah ïa ka Akhil Bharatiya Shiksha Samagam kaba ar ka ban long bad ka jingdap lai snem ka NEP 2020 ha ka 29 tarik mynta u bnai ha ITPO, Pragati Maidan, New Delhi. Kane ka prokram kaba ar sngi ka dei kaba pynlong da ka tnat Pule Puthi bad ka tnat Skill Development & Entrepreneurship. U Modi un plie paidbah ïa katto katne ki sienjam ha kane ka sngi. Ka Samagam kan pynbiang ïa ka rynsan na ka bynta ki riewshemphang na ki skul ki jaka ai jinghikai ba kham halor bad ki jaka pyntbit ha ki sap ban ïakren, ïamir jingmut bad ïasam jingmut, ki rukom treikam, ki jingjop bad ki rukom treikam ba biang tam ha ka jingpyntreikam ïa ka NEP 2020.
Ha ka jingkren shaphang ka jingpyntreikam ïa ka NEP 2020, u Prof Rohit Joshi Secretary sha ka Board IIM Shillong, u Prof Basav Roychoudhury bad Sanjeev Ningombam Coordinator CEDNER & Dr APJ Kalam Centre ki la batai shaphang ki sienjam ba la shim da ka IIM Shillong kiba ïahap bad ka NEP.
Ka IIM Shillong ka ngeit skhem ha ka pule puthi kaba bun bynta kaba mut ka rukom ai jinghikai kaba pynïasoh lang ïa ki jingpule bapher bapher, ka jingpynïasoh, ka jingïatreilang bad ka jingpeit ïa ki rukom pyrkhat bad rukom trei bapher bapher. Kumta, kane ka jaka ai jinghikai ka thmu ban wanrah ïa ka jingïar ha ki kam pule puthi ha kaba ki samla pule ki lah ban peit ïa ki jingeh bapher bapher na ka rukom pyrkhat bapher bapher bad kane ka wanrah ïa ki jingpynbeit kiba pura kiba wanrah ïa ka jingpynkupbor ïa ki samla pule ba kin ïatrei lang ha ki kam bapher bapher bad don ka bynta ha ki kam pule bad ka imlang sahlang.
Ki samla pule bad ki Doctoral Scholar ki ïoh ïa ka jingpule kaba bun lad. Ka rukom ai jinghikai ha ka IIM Shillong ka plié ïa ki lad ha ki rukom ïoh jingnang jingstad. Kawei na ki bynta kiba kyrpang jong ki prokram Doctoral ka dei ka jingailad ïa ki briew kiba la trei ba kin shim shuti haduh shi snem ban pyndep ïa kane ka prokram. Kane ka plié lad ïa ki ba kin ïoh ïa ka jingryntih ha ka jingwad ïa ka jingnang jingstad bad ki kam ba ki trei. Ha ryngkat ki jingpule kiba ïahap bad ki kam, ki jingai jinghikai ki don ruh ïa ki bynta bapher bapher kum ka “Management Learning from Upanishads and Indian Mythology,” “Chanakya Arthashastra,” “Management, and Liberal Arts,” “Wisdom Leadership: East-West Perspectives and Practices,” bad “Music, Aesthesis, and Communication for Excellence,” ha ryngkat kiwei kiwei.
Ka community immersion module jong ka IIM Shillong ka mut ka jingpyrshang ha ka rukom ïoh jingnang jingstad kaba mut ka jingïamir jingmut bad ki samla pule ha ki kam ka imlang sahlang. Kane ka ïaid palat ki kamra ïoh jinghikai kaba plié lad ïa ki ba kin ïakren, peit bad ïashim bynta ha ka jingim, ki rukom im bad ki jingeh ha ka imlang sahlang.
Ha kaba ïahap bad ka NEP ha kane ki jaka pule ki dei ban trei na ka bynta ka jingïoh jingnang jingstad jong baroh ki briew, ka prokram online executive MBA program jong ka IIM Shillong ka dei kaba la saiñdur kyrpang na ka bynta ki briew kiba la trei kaba plié lad ïa ki ba kin kyntiew ïa ka jingnang jingstad, ki sap bad ka jinglong nongïalam ha ka rukom ai jinghikai lyngba ki lad online kaba bun lad.
Ki centre ba kyrpang kum ka Dr APJ Abdul Kalam Centre For Policy Research and Analysis, Centre of Development of North East Region (CeDNER) ki kyntiew ïa ka jingwad bniah ha kane ka jaka pule kaba pynshlur ïa ki nonghikai bad ki shah hikai ba kin ïadon bynta bad ki projek wad bniah, ka jingsaiñdur thymmai bad ka jingseng kam lajong ha ka thaiñ shatei lammihngi.
Ban pynthikna ba baroh ki ïoh ïa ki lad ka pule puthi kaba bha, ba kynthup ïa ki samla pule na ki jaitbynriew ba dang sahdien, lyngba ka jingai jingïarap pisa kaba kot haduh T 1 klur, ka IIM Shillong ka kyrshan ïa ki samla pule khnang ba yn ym don mano mano ba duh ïa ka lad pule puthi namar ka jingduna pisa.
Ka NEP ka batai ïa ki rukom treikam khnang ba ki nonghikai kin kham pyntbit ïalade, kyntiew ïa ki rukom ai jinghikai, ïadon bynta ha ki kam wad bniah, ïatrei lang bad kito kiba don bynta ha kijuh ki kam, bad don bynta ha ka jingkyntiew ïa ka pule puthi ha ka ri. Ka IIM Shillong ka ai shibun ki lad ban kyntiew ïa ki nonghikai, lyngba ki jingai jinghikai bad ka jingkyntiew ïa ki sap ban kyntiew ïa ki rukom ai jinghikai, ki jinglah ban ïashim bynta ha ki jingwad bniah bad ka jingïahap bad ki jingtrei.
Ka NEP ka ithuh ïa ka bynta jong ka jingïatreilang ki jaka ai jinghikai bad ki jaka trei ban wanrah ïa ka jingïoh jinghikai kaba pura bad ka jingpynkhreh ïa ki samla na ka bynta ki kam ba kin trei. Ka IIM Shillong ka pynlong shibun ki kam ban wanrah ïa ka jingïatreilang ki jaka trei bad ki jaka pule kum ka jingleit jngoh ïa ki jaka trei, ka jingai jingkren na ki briew ba khot kyrpang bad ki seminar ha kaba ki riewshemphang na ki jaka trei ki ïakren bad ki nonghikai, bad ki ai jingmut na ki jingshem jong ki. Shuh shuh ka jingwanrah ïa ki projek kiba ïadei bad ki jaka trei hapoh ki jingai jinghikai ka wanrah ïa ka jingsngewthuh bad ka pyndap ïa ki jaka ba suda hapdeng ki jingïoh jinghikai bad ki jinglong ha ki jaka trei. Shuh shuh, ka jingpynlong ïa ki jingwad bniah lang, ki jingai jingmut bad ki lad ïoh jinghikai shuh shuh kiba ïadei bad ki jingdonkam ha ki jaka trei ki pynkhlaiñ shuh shuh ïa ki jingïatrei lang. Ka IIM Shillong ka la sdang ïa ki prokram MBA bad PhD na ka bynta ki briew kiba la trei khnag ban kyntiew ïa ka jingïoh jinghikai, kyntiew ïa ki lad ïoh kam jong ki samla pule, wanrah ïa ki jingsaiñdur thymmai bad wanrah ïa ka roi ka par ha ka jaka pule bad ki jaka trei.
La ïakren ïa ki san tylli ki rishot jong ka NEP 2020, ka jingïoh bynta, jingryntih, jingshongdor, ka jingjemdor bad jingbahkhlieh. Ka IIM Shillong ka la ïasoi ïa ki jingïateh soskular bad ka Indian Institute of Entrepreneurship, Guwahati, ka Mizoram Youth Commission, ka Sorkar jong ka jylla Arunachal Pradesh, bad Manipur University kum shi bynta ka jingthmu jong ka NEP na ka bynta ka jingïatreilang bad ka jingkyntiew ïa ki rukom treikam hapdeng ki jaka pule hapoh ka thaiñ shatei lammihngi. Ka IIM Shillong ka la pynshlur ïa ki samla na ka thaiñ shatei lammihngi ban buddien ïa ki jingthmu jong ki, ki kam khaii pateng, bad kiwei kiwei ki kam. Ka IIM Shillong ka ïarap ban ai jingïasyllok halor ki jait kam, ka jingïalam lynti ha ka jingseng kam lajong, bad ka jingpynkhreh ïa ka CAT ha ki college bapher bapher. Kawei ka bynta ba kongsan ban pynurlong ïa ka thong jong ka NEP kadei ka jingkyntiew ïa ki jaka ai jinghikai bad ka jinglong nongïalam. Ka IIM Shillong kan ïalam lynti bad kyrshan ban pyntreikam ïa ki rukom treikam kiba jop bad pynlong ïa ki prokram ban ïarap ïa ki college bad ki jaka pule ban kot sha kane ka thong.
Khatduh khatwai, ka National Education Policy (NEP) ka la wanrah ka jingkylla ha ka thong na ka bynta ka pule puthi ha India, bad ïa ka jingkylla lah ban sngewthuh ha ki jaka pule kum ka IIM Shillong. Lyngba ka nongrim kaba khlaiñ ba la buh da ka NEP, ka IIM Shillong ka bteng ban nohsynñiang sha ka jingkyntiew ïa ka pule puthi bad ka jingkyntiew kaba pura ïa ki samla pule jong ka, ka jingpynkupbor ïa ki ban wanrah jingkylla ha ka imlang sahlang bad kiwei kiwei ki kam.
U S Mathivanan Regional Director RDSDE u la ai jingkren shaphang ki sienjam ba la shim da ka Regional Directorate of Skill Development and Entrepreneurship ha kaba ïadei bad ka National Education Policy katba u Prof Ghanashyam Bez na NEHU u la batai shaphang ki sienjam ba la shim da ka skul bah ban pynurlong ïa ki jingmyntoi jong ka NEP ha ka jylla haduh mynta. U Prof Harish Chandra Das jong ka NIT Meghalaya u la ïashim bynta ha ka jingïalang lyngba ka bor internet lem bad u Ajaypal Singh Somvanshi, Principal jong ka National Skill Training Institute, Tura.
Shaphang ka Akhil Bhartiya Shiksha Samagam (29tarik– 30 tarik Naitung): Haba pyrkhat ïa ka jingthmu jong ka India ban don ïa ka ïoh ka kot kaba 5 trillion ha ka samoi jong ka Amrit Kaal, hap ban pynkhlaiñ ïa baroh ki kam jong ka ïoh ka kot lyngba ka jingpynbiang ïa ki nongïalam kiba don ka jingnang jingstad bad kiba la tbit ha ka kam. Ka NEP 2020 ka plie lad na ka bynta ka jingkyntiew bad pynkhreh ïa ki samla jong ngi na ka bynta kata ka jingkitkhlieh, pynkhreh ïa ki na ka bynta ki kam kiba dang mih. Ka polisi ka ban jur halor ka jingpynbiang ïa ki jingtbit kiba kham biang jong man u briew kum ka jinglah pyrkhat bad pynbeit ïa ki jingeh. Kumta, ka long kaba donkam ïa ki nongïalam ha ki kam ai jinghikai, ki riewshemphang ha ki polisi bad ki briew kiba la tbit ha ki jaka trei ba kin ïatrei lang ban phylliew jingmut bad pynkhreh ïa ka rukom treikam. Ha kane ka jingïalang yn don khathynriew tylli ki session ha ki ar sngi naduh ka 29 haduh 30 tarik Naitung, yn pynlong ïa ki jingïamir jingmut halor ka Jingïoh ïa ka Pule Puthi kaba bha bad ka jingsynshar, ka jingryntih bad ka jingpule kaba kynthup lang ïa baroh, ki jingeh ba ïadei bad ka Socio-Economically Disadvantaged Group (SEDG), National Institute Ranking Framework (NIRF), Indian knowledge System, ka jingwanrah ïa ka rukom treikam hapdeng ka pule puthi bad ka jingpyntbit lypa na ka bynta ka kam, bad ka jingpynryntih ïa ka pule puthi ha ryngkat kiwei kiwei ki kam.
Ha kine ki session yn don kumba 3000 ngut ki nongïashim bynta ba kynthup ïa ki Principal Secretaru jong ka Tnat Pule Puthi/Skill jong ki Jylla / UT, ki Director jong ki IIT, ki NIT, ki IIIT, ki IISER, IISC, ki Vice-chancellor jong ki Skul bah jong ka Sorkar Pdeng, Jylla bad ki Skul bah jong ki riew shimet, ki heh duh jong kiwei kiwei ki HEI, ki nonghikai, ki Principal / ki khynnah pule jong ki skul, ki ITI, ki heh duh / ki dkhot jong ki Regulatory Body kum ka NCERT, CBSE, UGC, AICTE, NCTE, NCVET, ki SSC, NSDC, ki heh duh / ki dkhot jong ka CII, FICCI, NASSCOM, ASSHOCHAM bad kiwei kiwei.
Sa kawei ka bynta ba khring bha jong ka jingrakhe kadei ka multimedia exhibition kaba pyni ïa ki sienjam ba biang tam na ki kam pule puthi ha ki skul bad ki jaka ai jinghikai ba kham halor. Yn don arspah tylli ki multimedia stall ban buh da ki jaka pule bad ka kynhun hapoh ka education and skill landscape, industry, bad kito kiba don bynta ha kane ka kam. Palat 2 lak ki nongïashim bynta kin leit jngoh ïa ka exhibition ha ki ar sngi, kynthup ki samla pule, ki volunteer bad ki nongïashim bynta jong ka Yuva Sangam.
Kan don ka jingïalang pynkut ïa kane ka prokram kaba ar sngi. Yn plie ruh ïa ka jingïalang da u Myntri Sorkar Pdeng ba dei khmih ïa ka Tnat Pule Puthi bad, ki Myntri Khynnah ba dei khmih ïa ka Tnat Pule Puthi lem bad u Sanjay Kumar, Secretary, Department of School Education & Literacy, u K. Sanjay Murthy, Secretary, Department of Higher Education, u Atul Kumar Tiwari, Secretary, Ministry of Skill Development and Entrepreneurship, ki heh duh jong ki Autonomous Body, bad ki ophisar jong ka Tnat Pule Puthi bad Tnat Skill Development and Entrepreneurship jong ka sorkar pdeng.
