Mawkyrwat, ‘Nailar, 05: Ka ophis treikam jong ka District Mental & Health Programme (DM&HP), South West Khasi Hills District mynta ka sngi palei ka lah pynlong ïa ka School Mental Health Awareness Programme ha Bethel secondary School Nonglang.
Ka jingthmu jong kane ka program ka long ban pynshai ïa ki khynnah skul halor ka koit ka khiah kaba dei ha ka liang ka jingmut jingpyrkhat bad ban pynkyntiew bad shimkhia ïa ka koit ka khiah ha ka liang ka jingmut jingpyrkhat.
Ki mat ba kongsan ki long ka jingdonkam ba kyrpang jong ka koit ka khiah ha ka jingmut jingpyrkhat, ki jait jingpang kiba ïa dei bad ka jingmut jingpyrkhat, ki dak ki shin jong kine ki jingpang, ki daw kiba wan rah ïa kine ki jingpang, ki lad ki lynti kumno ban ïoh jingïarap ne jingkoit lada ki ïoh kum kine ki jingpang.
Ha kane ka sngi ka la don ruh ki jingïalehkai pynbyrngia kiba ïahap bad ka phang jong kane ka program.
La pynïaid ïa kane ka program da ka kong N. Marbaniang, M&EO, DMHP bad ïa ka bynta kaba kongsan la shim da ka kong B. Snaitang, Psychiatric Nurse, DMHP. Ki nongshim bynta ki long ki khynnah naduh klas VIII haduh X.
