Pynshai ka DLSA ïa ki lad jingïarap ba ju ai sha ki lanot na ki longïing baduk

Mawkyrwat, Nailar, 02: Ka ophis District Legal Services Authority (DLSA), South West Khasi Hills District ryngkat ka jingïatreilang bad ka ophis District Disaster Management Officer (DDMO), South West Khasi Hills District ka la pynlong ïa ka prokram halor ka ‘NALSA Scheme for Legal Services to Disaster Victims lyngba Legal Service Authorities’ bad kumjuh ruh ka jingpynshai halor ka Disaster Management Plan ba la pynlong ïa kane ka program hapoh ka Hall jong ka District & Sessions Court, South West Khasi Hills District, Mawkyrwat.
Ka jingthmu jong kane ka prokram ka long ban ai jingpynshai ha ki khynnah skul halor ka ‘NALSA Scheme for Legal Services to Disaster Victims lyngba ka Legal Service Authorities’ ha kaba lyngba ka Legal Service Authorities la kdew ba kam don kino kino ki jingïarap lyngba ki skhim hynrei lyngba ki Legal Aid Council bad ki Paralegal Volunteers kiba trei hapoh ka District Legal Services Authority (DLSA), kiba long ka jingkieng ban pynïasnoh ïa ki briew ha ki shnong ki thaw bad ki briew kiba don ha ka sorkar ha kaba ïa dei bad ka phang jong ka Disaster Management.
Ka kong Nosmi Hahshah, Chief Legal Aid Defence Counsel jong ka District Legal Services Authority (DLSA), South West Khasi Hills District ha ka jingkren jong ka halor ka ‘NALSA Scheme for Legal Services to Disaster Victims lyngba Legal Service Authorities’ ka la ong ba kane ka dei kawei na ki bynta ba ka leit sha ki paidbah ba kin ïoh ki jingïarap ha ki por ki shem jingeh ha kaba ïa dei bad ki jingshah lynshop ha ki bor jong ka mariang.
Kumjuh ka la batai shaphang kumno ban tip ha kaba ïa dei bad ki aiñ ki kanun ba ka jingdon jong ka ophis jong ka District Legal Service Authority (DLSA) ha Mawkyrwat kan ïarap shibun ïa u duk u suk khamtam eh kito kiba duna ha ka ioh ka kot lada ki ïa kynduh ïa kino kino ki jingshah ban beiñ kumta lyngba ki nongïasait-aiñ ne ki pulidar kin ïoh jingïarap khlem kano kano ka jingsiew pisa sha kito ki briew kiba donkam jingïarap ha kiba bun ki bynta kum ha ki kam ba shah lyngshop ha ki bor mariang, ki jingshah ban beiñ, ne shah-ñion beiñ ha ki jinglongbriew manbriew ha kiba bun bynta katkum ka kyndon aiñ ba la buh.
Ka la ong ruh ba na ka liang ka ophis ka ïarap ruh ïa kito ki longïing kiba duh noh ïa ki kot ki sla ba donkam da kaba shah bamduh ha ki jingpluh ding ne ha kano kino ki jingjia ba sngewsih kiba ktah lyngba ki bor jong ka mariang. Kumjuh ruh ha kaba ïa dei ki khunswet bad ruh kiba don ki jingduna ha ki dkhot met jong ki briew bad shibun kiei kiei ba ki briew ki shem jingeh ha kiba bun ki bynta kane ka ophis kam ïarap kum ïa kita lyngba ki nongïasait-aiñ.
U Dr. E.S. Langshing, District Disaster Management Officer (DDMO), South West Khasi Hills District u la ai jingmut ba ka long kaba donkam haduh katta kata ba ha ki nonghikai pule ki dei ban don ïa ka ‘School Disaster Management Plan’ namar kane ka dei kawei na ki shatri ban ïada ïa ki khynnah skul bad ïa ki nonghikai ruh lada wan jia jingshah lynshop ha ki bor jong ka mariang. “Lada ki long kiba la khreh lypa kano kano kaba sniew kan nym wan jia ha ka jingim jong ngi ki briew”, ong u Dr. Langsiang.
Shuh shuh ha kane ka sngi ban pynsngewthuh shuh ia ki jingbatai, kumno ban leh bad ïada lada wan kynsan u jumai, u Dr. Langsiang u la pynleh da ka practical ïa ki khynnah skul khnang ba kin kham sngewthuh shai bad ioh jingmut ban hikai lem ïa kiwei de ki para khynnah skul.
Haba bynrap ïa ka jingkren, Dr. E.S. Langshing u la ai mynsiem ïa ki khynnah skul ba kim dei ba long kiba jaipdeh ha ki jingpule hynrei ki dei ban long kiba trei shitom khnang ba kin lah ba kiew na kawei na kyrdan sah kawei pat.
Haba kren ha kaba ïa dei bad ki lad jingiarap lada wan kino kino ki jingshah lynshop ha ki bor jong ka mariang, u Dr. Langsiang u la ai jingmut ba kim dei ban shu sngap hynrei ki dei ban mih shakhmat ban pyntip mar mar sha ki bor ba dei peit khnang ba kin ïoh ki lad jingïarap kiba kyrkieh. Namarkata, ka long kaba donkam ba kum ki khynnah skul, ki nonghikai ki dei ban long ki nongrah jingtip halor kine ki jingai jingmut sha kiwei de khnang ba kan long ka jingïarap.
Ïa ka jingïalang, ka jingkren lamphrang bad jingkren khublei ha kane ka sngi la ïoh na ka kong D. Sohtun, MJS, Chief Judicial Magistrate-cum-Secretary, District Legal Services Authority (DLSA), South West Khasi Hills District.