Pynshai bad ïaphylliew jingmut ka ka MACS halor ka jingpang HIV/AIDS
Khliehriat, Jymmang, 14: Ka Meghalaya AIDS Control Society (MACS) ryngkat ka jingïatreilang bad ki bor synshar jong ka East Jaiñtia Hills District ha ka sngi Baar ka la ai jingpynshai halor ka jingpang HIV/AIDS ha ka prokram ba la pynlong ha Conference Hall ha ophis u Deputy Commissioner ha Khliehriat.
Ka jingthmu jong ka prokram ka long ban wanrah lang ïa ki tnat reikam bapher bapher jong ka sorkar ban ïatreilang ha kaba ïadei bad ka jingai jingpynshai halor ka jingpang HIV/AIDS
Ka Additional Deputy Commissioner, East Jaiñtia Hills District Kong J. U Kharpuri ka la ban jur halor ka jingdonkam ban don ka jingïatreilang ki tnat sorkar ban pynkhlaiñ shuh shuh ïa ki prokram ai jingpynshai ne ki awareness prokram hapoh ka district khnang ban ïada na ka jingpang HIV/AIDS, la kyntu khamtam ki ophis jong ki Block Development Officers, ki bor pynïaid shnong bad kiwei kiwei ki kynhun ban pynlong awareness prokram halor ka HIV/AIDS.
Ka Kong Kharpuri ka la ong ruh ba da ka jingshimbynta bad da ka jingïatreilang ki tnat bapher bapher kan pynlong ruh ïa ki paidbah ba kin mih shakhmat ban wan ban ïa shimbynta lang ha ki prokram bad ruh yn lah lah ruh ban ai ki jingïasyllok ba mar met bad kito kiba shah ktah ha u HIV/AIDS.
Ha kane ka jingïalang, u Deputy Director, Mainstreaming Meghalaya AIDS Control Society, Shillong, u Bah Ajoy M. Lanong u la kren halor ka phang ka jingïaidlynti ka jingpang HIV/AIDs bad kumno ka ïa bit nawei shawei, u la pan ka jingïatreilang na ki tnat bapher bapher ban pynlong ïa ki prokram bapher bapher ban pynduna ïa ka jingshah peit ibeiñ ïa kito kiba don ïa kane ka jingpang, ban thaw ki lad ban ai ki jingïarap.
Ka Programme Manager, Mihmyntdu Community Social Welfare Association (MSCWA), Khliehriat, ka Kong Rinibeth Patlong ka la pynsngew ïa ki jait prokram bapher bapher ba ka MSCWA ka la leh ha kaba ïadei bad ki prokram halor ka HIV/AIDS, ka la khot bad wer lang ruh ïa ki tnat sorkar kumjuh ruh ki bor pynïaid shnong ban ïatreilang bad ban ïa shimbynta lang ha ki prokram kiba yn sa pynlong.
Ha kane ka jingïalang ka la don ka jingïakren bad jingïaphylliew jingmut lang hapdeng ki heh sorkar, ki nongïalam Balang bad ki nongpynïaid shnong ha kaba ïadei bad ka HIV/AIDS.