Pynsangeh shuwa ka High Court ïa ka MOU pynbeit pud ka Meghalaya bad Assam
![](https://mawphor.com/wp-content/uploads/2022/12/pynbeitpud.jpg)
Shillong, Nohprah 8 : Ka ïing bishar High Court jongka jylla ka la hukum ban pynsangeh shwa ïa ka jingpynbeit pud hapdeng ka Meghalaya bad Assam kat haduh ka 6 tarik Rymphang 2023. Hapoh kane ka por ym dei ban sieh mawpud ne phiah ïa u pud u sam hapdeng ki ar jylla ong ka ïing bishar.
ïa kane ka hukum la pynmih da ka Single Bench hadien ba la bishar ïa ka mukotduma kaba la kyntu ïa ka ïing bishar ban pynsangeh shwa ïa kane ka Memorandum of Understanding (MOU) ba la ïasoi da ka sorkar Meghalaya bad Assam ha khmat u myntri kam pohïinig ka ri u Amit Shah ha nongbah Delhi ha ka 29 tarik Lber 2022.
ïa kane ka mukotduma la ujor da ki khlieh nongsynshar ba kynthup ïa u Syiem ka Jirang u R Hamberly Wahlang, u Acting Syiem ka Hima Mylliem u paiem Ainam Manik Syiem, Sirdar jongka Nonglang Sirdarship u Pholasly Nianglang bad u Acting Syiem ka Nongspung u Erald Jyrwa.
“ La rai ba hapoh kane ka por kata ka 6 tarik Rymphang 2023 ym bit ban sieh mawnongrim ne pynbeit pud bad ka jingshong bishar halor ka MoU kan la long biang” ong ka hukum ba la pynmih da u nongbishar Justice HS Thangkhiew.
Ka jingshong bishar biang halor kane ka mukotduma kan long ha ka 6 tarik Rymphang 2023.
Kine ki khlieh nongsynshar ha ka jingujor ki la kyrpang ïa ka ïing bishar ban pynsangeh shwa ïa ka MoU ba la ïasoi ka Meghalaya bad Assam namar ka long pyrshah ïa ka Article 3,13 bad 29 (1) bad ïa ka Sixth Schedule jongka Riti Synshar ka ri namar kane ka long kumba la ïuhroit ïa ki hok tynrai kat kum ka Article 14 bad 21 jongka Riti Synshar ka ri bad ban pynmih da kawei ka hukum sha kine ki ar jylla ba kin bud ryntih ïa ka Sixth Schedule jongka ri shwa ban ïasoi ïa kino kino ki jingmynjur ban aiti ïa ki khyndew ki shyiap namar ka kam kyndew bad shyiap ka dei kaba la peit da ki District Council jongka jylla. Ki la kynnoh ba ïa ka MoU la ïasoi kahlem da ïoh ka jingmynjur lang na ki Syiem ki Sirdar bad Khasi Hills Autonomous District Council kiba hap hapoh ka Sixth Schedule.
Nalor kane ki khlieh nongsynshar ki la pynpaw ruh ba ka jingïasoi ïa ka MoU ka long ruh pyrshah ïa ka Article 3 jongka Riti Synshar ka ri namar kat kum katei ka article dei tang ka Parliament kaba lah ban pynkylla ïa ki pud ki sam jong ki jylla bad kam don kano kano ka jingpynrung kyndon ha ka Seventh Schedule ruh kaba mut ba ki jylla kim don ka bor ban pynbeit ïa u pud u sam jong ki jylla.
Ki la ong shuh shuh ba ka MoU ka long kaba la pynkheiñ lypa ïa ki kyndon ba la ïasoi da ki ar jylla ban pynbeit ïa u pud u sam namar khlem da bud ïa ka histori jong ki jaka, ki jaidbynriew kiba shong ba sah, ka jingdon u pud u sam bad khamtam ka jingbym don jinghun na ki paid khappud. Ha ka jingbishar u nongïasaid ki khlieh nongsynshar u P Sharma u la pynpaw ba shwa ban pynbeit ïa u pud u sam la buh dak lypa ha khappud shwa ban ïasoi ïa ka MoU ruh.
Na ka liang ka ïing bishar ka la pynpaw ba haba bishar ïa kaei kaba la pynpaw da u Advocate General, ka paw ban pyrshah ïa kane donkam ban ai da ka Affidavit khnang ba ka ïing bishar kan shim bishar bad shim rai halor kane ka kam. Kumta ka ïing bishar ka la shah ïa u AG ban ujor pyrshah ïa kane ka mukotduma.
Kitei ki jaka ba la mynjur ban ïa pynbeit pud kat kum ka MoU ki long ka Tarabari (4.69 sq.km), Gizang (13.53 Sq.km) Hahim (3.51 Sq.Km) Boklapara (1.57 Sq Km), Khanapara-Pilangkata 2.29 Sq.Km bad Ratacherra 11.20 (Sq.km). Kumta ka jingheh ki jaka baroh ka long 36.79 Sq Km.
Hadien ka jingïakren ïa pynbeit bad leit jurip da ki Regional Committee ïa ki bynta khappud kumba 18 Sq.Km tam kan wan sha Meghalaya bad 18 Sq Km kin leit sha ka Assam.