Shillong, Naitung, 15: U nongïalam jong ka TMC Youth Wing u Richard Marak ha ka sngi Saitjaiñ ula pynrem jur ïa ka jingkren jong u Myntri Rangbah ka Jylla Assam u Himanta Biswa Sharma.
“Ka jingkren jong u (Himanta) ka dei ka jingkynthoh ïa ka jaitbynriew Miya bad ka long ka jingkren kaba ïalam bakla. Ka jingkren jong u Himanta ka pynpaw ba um don jingtip eiei ïa kane ka jaidbynriew. Ka jingkren ka dei kaba shu kynthoh khlem nongrim bad kaba shu kren laplah,” ong u Marak ha u kyrwoh.
U la ong ba ka jingkynthoh jong u Sarma halor ka jingkiew dor jong ki marbam ka dei namar ki jaidbynriew Miya ka long ka jingkren laplah ba khlem nongrim bad kaba pynhiardor.
“Ha ka jingshisha, ka dor jong ki jhur la peit hi da ki nongpynïaid ha iew bad kam shym la don satia ka jingpynkiewdor da ki nongdie. Ka jingkynthoh pyrshah ba ki nongdie jhur kham bun ki dei ki Miya ka long kaba bym don nongrim bad kaba shu kren na ka malade,” u la ong, “ka jingkren jong u Myntri Rangbah ka Assam ba ki samla ka Assamese ki dei ban beh krad ïa ki nongdie jhur Miya ka dei ka jingkren kaba pynmeh ding bad kaba lah ban lam sha u pud jong ka jingïapher jaidbynriew.
U Marak u la ong ba dei ban leh da kaba tyngeh katkum ki kyndon jong ka aiñ pyrshah ïa ki nongïalam kiba kynshoit ïa ka jingïaumsnam bad ka jingïasih pyrshah ïa kano kano ka jaidbynriew.
“Ka dei ka kamram jong ka ingbishar ban pynthikna ba kum kine ki nongïalam ki dei ban shah tian bishar.
