Shillong, Naitung 28: Ha ka sngi jong ka prokram plie ne ka opening ceremony jong ka Paris Olympics 2024 la iathuh ba ka la don ka jingshah beiñ bad shah kynthoh lai phew jait na ki kynhun niam ha kylleng ka pyrthei khamtam ki paid Khristan, hadien ka jingpyni ïa ka Syiem ba shah patan, ba pynkynmaw ïa ka dur ‘Jingkhawai U Trai’ (Last Supper) u Leonardo da Vinci ha kane ka prokram.
Ka khubor ka ïathuh ruh ba ha kane ka prokram la pyni ïa u Jisu ba la buhjli da ka kynthei kaba sngaid ba phong ïa ka jingdeng khlieh da ka rupa, uba dang ïabam jingbam lang bad ki synran hashwa ka jingshah sahnarphna, bad uwei pat ba ai rongblue baroh shi ryngïeng bad deng ïa ki syntiew, kaba pyni kum ka dak jong ki jingbam ba la ai ban ïabam lang.
Halor kane ka jingjia ki la mih ki jingkynthoh ba lai phew jait ha ki rynsan social media ha kaba bun ki la pynrem ïa kane ka prokram da kaba ong ba ka dei ka ‘jingibeiñ’ ïa ki Catholic.
Haba ïadei bad kane na ka liang u Myntri Rangbah ka Jylla Conrad K Sangma ula thoh sha ka social media ba pynpaw ïa ka jingsngewsih bad ong, “Sngewsih jur ban ïohi ïa ka jingïapatan ha ka prokram ba pyni ïa ka ‘Jingkhawai U Trai’ hapoh ka Paris Olympics. Dei ban burom ïa ka jingsngew jong kiwei ki Niam. Nga pynrem jur ïa kum kane ka jingleh”.
Haba pynksan, ka Paris Olympics Organizers ka la kam ba kane ka prokram ka thmu ban pyni ïa ka jinglong khlemakor bad jingjrong kti hapdeng ki khun bynriew.
Kane ka jinglehkmen ka kynthup ruh ïa kiwei ki jingleh kiba pynmong kum ka jingpyni ïa ka khlieh ka Maria Antoinette ba mait bad kiwei kiwei, kaba la nang ai ding ïa ka jingïatai halor ka rukom pynkhreh ïa ki prokram ba la pynlong ha kane ka sngi plie ïa ka Olympics, ong ka khubor.
