Jowai, Nailar, 02: Ka Hynñiewtrep People Youth Front (HPYF) Central Body ka pynrem jur ia ka tnad Forest ha ka jingïadei bad ka jingsyllen jong ki lum ki khlaw, tang na ka daw ba bun ki kharkhana ot dieng (sawmail) hapoh ka thaiñ East bad West Jaiñtia Hills District.
La ïathuh baroh shi kata kala seng kala lap bun ki dieng ba shah ot nalor ki dieng kiba dang rit bad ha ka jingshisha ka Forest Department ki dei ban sngewthuh ïa ka jingkordor ka mariang.
Halor kane ka seng HPYF-CB ka pynrem jur ïa ka tnad khlaw ba kam shem la kheiñkor ïa ka mei mariang bad ka jingbym siudñiew jong ki ïa ka jingsyllen ki khlaw ki btap.
Ka seng kala kynthoh ba ka tnad khlaw kumba long mynta kala klet noh ïa ka kyntien “Clean and Green Environment” bad ka kamram jong ka ban khmih ïa ka mariang.
