Pynrem ka HNLC ïa ka rai UAPA Tribunal ban pynjlan sa san snem ka jingkheiñ beaiñ ïa ka seng

Shillong, Jymmang 26: Ka seng Hynñiewtrep National Liberation Council (HNLC) ha ka sngi Nyngkong ka la pynrem ïa ka rai ba dangshen ka UAPA Tribunal ba la pynïaid da u Justice Soumitra Saikia ba pynksan ïa ka hukum ka Ministry of Home Affairs (MHA) ban pynjlan sa san snem ïa ka jingkheiñ beaiñ ïa ka Seng.
Katkum ka kyrwoh khubor, u General Secretary ka HNLC u Bah Sainkupar Nongtraw ula ong, “Kane ka rai ba la pynmih ha u Jymmang 2025, kam dei kaba wad ïa ka jingbishar ba hok hynrei ka dei ka kam saiñ pyrthei ban pynlong kam bymman ïa ka jingïakhih laitluid jong ki trai ri trai muluk. Ka jingïai bteng ban pyntreikam ïa ka UAPA ha ka HNLC ka pyni ïa ka jingsheptieng jong ka Ri India ïa kino kino ki jingtynjuh pyrshah ïa ki bor ba ka pynjari ha ka Bri u Hynñiewtrep.”
U la kynnoh ruh ba ka UAPA ka la kylla long ka atiar ban ïuhroit ba la pyndonkam ym ban ïakhun pyrshah ïa ki kam lehnoh hynrei ban pynduh pyndam ïa ki jingïapher jingmut ha ka synshar khadar, ki jingangnud jong ki thaiñ bad ka sur ki trai ri trai muluk.
U la ong, “Da kaba buh dak ïa ka HNLC kum ka seng beaiñ naduh u 2020, ka Ri India ka la kiar ban pynbeit ïa ki daw tynrai jong ka jingïaleh ki Hynñiewtrep: ka jingshet kylla pateng la pateng, ka jingkyntait ïa ka hok ban rai hi dalade ïalade, bad ka jingpyndonkam bakla ïa ki briew jong ngi bad ïa ki jingdon jingem jong ngi.”
“Ka HNLC kam kwah ïa ka lynti ban pynthut ïa ka jingsuk bad ka shongsuk shongsaiñ, ngi kwah ban pynphai biang kumjuh ïa ka jinglong laitluid jong ka Bri bad ïa ki hok kiba la ïai kyntait na ka por sha ka por. Ngim dei ki lehnoh, ngi dei ka sur saiñ hima sima jong ka bri u Hynñiewtrep. Ka jingïaleh pyrshah jong ngi kam suhthied ha ka jingshun, hynrei ha ka histori, ka jingbishar hok bad ka jingangnud ban long laitluid ha la ka jong ka bri,” u la ong.
Na ka liang u Bah Sainkupar u la ong ba ki 48 tylli ki kam bymman bad 73 tylli ki jingshah kem hapdeng u 2019 bad 2024 ki dei shi bynta jong ki buit treikam ba baroh ki ïatip, tang ban pynheh ïa ka jingkheiñ bad ban pynmih ïa ka jingtieng ban pynksan ïa ka jingthombor.
“Bun na kiba shah kem ki dei ki samla ba lui lui, kiba shah kynnoh bym dei namar ka jingpynpaw ïa ka jingïadon ryngkat bad ka HNLC lane ba kyntait ban ïatreilang bad ki bor treikam ka ri India. Kine kim dei ki riew bymman, ki dei ki langknia jong ka jylla kiba ïohi ïa ka mynsiem ieid ri hapdeng ki paid trai ri trai muluk kum ka jingma” ula bynrap.
Halor kane, u Bah Sainkupar ula ong ba ka jingkynnoh ba ka HNLC ka la pyndonkam ïa ki rynsan social media ban pynkylla nongbud ïa ki samla ka dei kawei pat ka jingpynman kaba ïalam bakla. U la kam, “Ha ka jingshisha ngi ai jinghikai bad kyrsiew thiah ïa ki samla ka Hynñiewtrep, ban pynïasoh biang ïa ki bad la ka tynrai, ka khana pateng ba la shah tuh bad ka hok ba la ai pateng kum ki briew ba laitluid. Kaei kaba ka Ri India ka sheptieng hok kam dei ka jingïaumsnam, ka tieng ïa ki jingtip. Ka tieng ïa ka pateng ba kan ïeng ha ka jingshai bad ka jingkut jingmut, ka pateng kaba kyntait ban nguh ban dem lane ban shah pynbiej.”