Pynrem ka GHYS ïa u Contractor ba kam ba u la pyndep lut ban pyntrei ïa ka projek JJM

Shillong, Ïaïong 20: Ka seng Garo Hills Youth Solidarity (GHYS) Rongjeng Unit ka la pynrem jur ïa ka jingkam da u contractor ba u la kam ba la pyndep ïa ka jingpyntrei ïa ka Tesokgittim Jal Jeevan Mission (JJM).
Katkum kane ka kynhun, ka kam ba la pyntrei da u contractor ka khlem da la lah ban pynurlong kumba la khmih lynti naba 20 per cent na ki longïing ki la shah ieh khlem da la ïoh ka jingpynpoi ïa ka um sha ki longïing jong ki.
Ka seng ka la kynnoh ba u contractor u la buh ruh da ka sign board kaba thoh ba la pyndep ïa ka kam hakhmat ka top um kaba la rim ba la shna da ka tnat PHE ha shwa ban sdang ïa kane ka projek jong ka JJM bad ym don ruh na ki nongshong shnong ba kynthup ïa ka water sanitation committee kiba don jingtip shaphang kane ka jingpyndep ïa kane ka kam, ïathuh ka GHYS.
Kane ka seng ka la ïathuh ba ka JJM water tank bad ki pipe ruh ki long kiba rit kaba ym lah ban dap ban sam um sha ki longïing.
Ka seng GHYS ka la don ruh ka jingthmu ban leit sha ka Ïingkashari pyrshah ïa kane ka jingbym lah ban pyndep ïa kane projek bad ka jingbym bud ïa ki jingkdew jong ka JJM da u contractor ne da ka tnat.