Pynrem jur ka TMC u MLA bad ki Sengbhalang ba shah kawang Tear Gas ki Nonghikai Kontrak

Shillong, Risaw, 06: Khyndiat kynta hadien ba ki Pulit ki la pyndonkam ban kawang da ki bom pynsat khmat ïa ki nonghikai skul kontrak kiba don hapoh ka shatri jong ka Meghalaya Government Contractual Teachers’ Association (MGLPCTA) kiba leit tur sha ophis Main Secretariat, Shillong ha ka sngi Thohdieng, ki kynhun bapher bapher ki la mih shakhmat ban pynrem jur ïa kane ka jingleh jong ki Pulit bad ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP).
“Kane ka jingleh jong ka Sorkar ka dei kaba hap ban pynrem bad ka bym lah satia ban pdiang. Ka mynsiem jong nga kan don ryngkat bad ka longiing longsem jong ki nonghikai,” ong u President ka All India Trinamool Congress (AITC) Meghalaya u Bah Charles Pyngrope ha ka rynsan Twitter.
“Mynta ka sngi, ki nonghikai bad ki khun ki kti ki la mad ïa ka jingmynsaw bad ka jingsheptieng na ka daw ka jingpynbthei ïa ki bom pynsat khmat. Ko Sorkar MDA, ki nonghikai ki pynlong ïa ka jingïakhih kaba jai jai na ka bynta ka hok jong ki,” u la ong bad bynrap, “ha ka jaka ban sngap ïa ka jingeh jong ki, ki la shah leh ibeiñ. Hato ki dawa ïa kane? Sa katno pat kin dang shah jynjar ha ki kti jong phi?” la buh jingkylli une u nongïalam ka AITC.
U MLA jongka Mawlai Constituency u bah P.T Sawkmie ruh u la pynrem jur halor kane ka jingsiat tear gas ne lyer pynsat khmat ïa ki nonghikai kaba pynpaw ba ka sorkar MDA kam don jingburom shuh pleng wat ïa ki nonghikai ruh. La ñiew ïa ki kum ki riew khlaw na kata ka daw sa pyndonkam da ki tear gas. Ha ka jingshisha kum ki briew kiba bat ïa ka kyrdan nonghikai lada shu pakhang lynti bad pynsngewthuh ïa ki ki la sngewthuh hi ym donkam ban da siat da ki tear gas. U Dawa ba ka sorkar ka dei ban shim khia bad tohkit mano ba phah siat tear gas ïa ki nonghikai bad ban pynshitom ïa kiba donkti. U dawa ruh ba ka sorkar ka dei ban khot ïakren ïaki bad thaw ki lad ki lynti kumno ban ïarap ïa ki la ka long ha kano kano ka rukom ruh.
U State President jong ka Meghalaya TMC Students’ Union u samla Bansharailang Pyngrope u la leit jngoh dalade ïa ka kynhun ki nonghikai skul kontrak tang hadien kane ka jingjia.
“Ngi don hangne ban ai jingkyrshan sha ki nonghikai ki bym shym la khmih lynti ban shah thombor ha ka Sorkar. Ka long kaei kaei kaba sngewsih bad kaba pynkyndit ïa ngi. La palat shi bnai, ki nonghikai ki ïakhih da kaba jai jai, hynrei ka long pat ka jingjia kaba sngewsih ban ïohi ïa kane ka jingjia mynta ka sngi,” u la ong.
“Ngi buh jingkylli ïa ka Sorkar, mano ban shim jingkitkhlieh halor kane,” la bynrap u Samla Pyngrope.
Ka Federation of Khasi Jaintia and Garo People (FKJGP) ka la mih shakhmat ban pynrem jur halor kane ka jingjia bad ong ba ka jingleh jong ki Pulit ka long pyrshah ïa ka aiñ longbriew manbriew namarba kim pyrkhat shuh ïa ki nonghikai kynthei lane ki khunlung kiba don lang hangto
“Kine ki nonghikai ki la shong mynta la shi bnai ha khmat u durmot jong u Kiang Nongbah hynrei ka Sorkar ka la leh mynthi ïa ka jingdawa ka jong ki. Kaba lyngngoh ïa ngi kum ka seng bad ki paidbah ka long ba ym don Pulit kynthei ha ka por ba kine ki nonghikai ki tur sha Secretariat watla ka tip shai ba don ki nonghikai kynthei,” ong ka Seng.
“Ha ka jingshisha ki Pulit ki ladei ban pynjaijai haba ki la tip ba don ki khunlung ha kane ka kynhun ba tur sha Secretariat. Ka seng ka ai jingkyrshan pura ïa ki nonghikai bad ka phah ruh ka jingkitbok kitrwiang ïa ki bahaiing hasem jong ki,” ong u Senior Vice President ka Seng u Bah Elton Cliff Warjri.
Ki dkhot jong ka Khasi Students Union (KSU) kiba la leit mar mar ban ai mynsiem ïa ki nonghikai skul kontrak ki la dawa ïa ka Sorkar Jylla ban pynshitom ïa ki Pulit kiba la ai ka jingbthah ban kawang da ki bom pynsat khmat ïa ki nonghikai skul kiba tur sha Secretariat.
“Ka KSU ka pynrem jur ïa kane ka jingleh jong ki Pulit bad ka dawa ban pynshitom ïa u Pulit uba la ai jingbthah ban kawang da ki bom pynsat khmat bad ban bom lathi ïa ki Nonghikai kontrak ba ïakhih jai jai” ong u Chairman ka Education Cell ka KSU u samla Raymond Kharjana.
U la buh jingkylli halor ka jingbym don jong ki Pulit kynthei bad ka jingpyndonkam tang da ki Pulit shynrang ha kane ka sngi.
U la ong ba ka Seng kan ym shong kli kti hynrei kan ïai dawa ïa ka Sorkar ba kan khot ïakren ïa ki nongïalam jong kane ka kynhun ki nonghikai sha ka miej jingïakren khnang ban ïakren da ka jingsngewthuh.