Pynrem jur ka ‘Save Hynñiewtrep Mission’ ïa ka jingthoh u CEM ka KAAC ba ki Khasi Pnar ha Khappud kidei ki poiwir
Kum ka dak ban pyrshah thang syndon ïa katei ka jingthoh
Jowai, Naiwieng 30 : Ka ‘Save Hynñiewtrep Mission’ kiba kynthup ïa ka JSM, HYC, EJNC, CoRP bad HANM mynta ka sngi kila kila leit ban kynduh ïa u Chief Executive Member (CEM) ka Jaiñtia Hills Autonomous District Council (JHADC) ma Thombor Shiwat halor ka jingthoh laplap khlem nongrim u Tuliram Ronghang CEM ka Karbi Anglong Autonomous Council (KAAC).
Katkum kane ka jingthoh bala aiti ha u ma Shiwat la pynpaw ba ka KAAC ka kynnoh ba ki nongshong shnong na ka jait bynriew Khasi Pnar kiba shong basah ha Mukroh bad kiwei ki jaka kum ha Psiar, Khanduli bad Block-1 ki dei kum kita ki poiwir ba shong beaiñ (illegal settlers).
Na ka liang ka ‘Save Hynñiewtrep Mission’ ka pynrem jur ïa kane ka jingthoh jong utei u nongïalam ka KAAC ha ka rnsan social media bad kane ka pynpaw shai ba utei u briew um don jingtip eiei ruh em halor ka History bad halor ki jingshisha baroh ha kaba ïadei bad ka kyndew ka shyiap ha Mukroh, Barato, Psiar, Khanduli bad ka Block-1.
Shuh shuh kila pynsngew ba ka KAAC ka dang mih tang ha ki snem 1952 shaneng hynrei ki briew na ka jaitbynriew Khasi Pnar kila shong shnong ha ki thaiñ Mukroh, Psiar, Khanduli bad Block-1 (Labang Nongphyllut) da ki spah bad ki hajar snem bad ki Khasi Pnar ha kitei ki thaiñ ki dei ki trai ri trai muluk bad ki trai jong ka khyndew ka shyiap namar ka jingthoh jong utei u CEM ka KAAC ba ki Khasi Pnar kim dei ki poiwir bad ki nongshong beaiñ kumba ka kynthoh.
Halor kane ka kynhun ki seng bhalang kila dawa na u CEM ka JHADC ba un shim khia ïa kane ka jingshah kynnoh bad la dawa ban ai ka jingïada ïa ka khyndew ka shyiap bad u pud u sam jong ki shnong bad ki Ekala kiba hap hapoh ka JHADC khlem kano kano ka jingpyndem, la dawa ruh ban pynbeit noh ïa u pud u sam hapdeng ka Meghalaya bad Assam da kaba pynshong nongrim ïa ka history, ki map bad ki kot ki sla jong ki shnong bad ki Elaka kiba hapoh ka JHADC, la pynsngew kitei ki san seng ha u CEM ka JHADC.
Hadien ka jingïa kynduh bad u CEM ka ‘Save Hynñiewtrep Mission’ kala pynlong ka jingthang ïa katei ka jingthoh laplap jong u CEM ka KAAC.