Pynrem jur ka DS Lachaumiere ba tynrah ka Scooty uwei u khynnah ïa u Rangbah Shnong jong ka

Shillong, Ïaïong 27: Ka Dorbar Shnong Lachaumiere ka la pynrem halor ka jingñiah kali kulmar hadien ba ki la dep dih kiad da uwei uba dang khynnah kaba la lam sha ka jingjia ban tynrah ïa u Rangbah Shnong u Dr. Aman Warr kaba la jia ha ka 25 tarik mynta u bnai kaba la pynlong ruh ïa u Rangbah Shnong ban mynsaw na ki bynta jong ka khlieh.
Ha ka jingthoh na ka liang u secretary ka dorbar shnong u Bah Orester Jala Kharbhih u la ong, “Kane ka dei ka jingjia ka bym poi pyrkhat kaba la mih na ka jingñiah kali hadien ba la dih kiad da u khynnah uba dang rit ka rta, ha kaba kane ka la buh ka jingma ïa ka jingshngaiñ bad ka bha ka miat jong ki paidbah. U Rangbah Shnong u la ïoh ka kyrdan kaba don burom ha ka jaitbynriew jong ngi, uba ai ka jingshakri kum ka dak jong u nongïalam bad ka jingïalong kawei. Ka jingktah jong kane ka jingjia da u Master Kunal Singh ka la don ka jingktah kaba jur, ym tang ha ka ïing ka sem jong u bad ka dorbar shnong, hynrei ha baroh kawei ka shnong kaba u la shakri da ka jingaiti ïalade.”
“Ngi pynrem jur ïa kane ka jingleh kaba la lam sha kane ka accident bad kaba la pynlong ruh ïa baroh ki dkhot jong ka imlang sahlang ban ithuh ïa ka jingktah kane ka jingjia na kum kane ka jingleh. Ka jingñiah kali pathar bad kaba dang dei ruh ha ka rta kaba dang khynnah da kaba dih ruh ïa ka kiad haba ñiah kali ka wanrah ka jingma ïa ka jingim bad ka pynthut ruh ïa ka jingsngew long shipara hapoh ka jaitbynriew jong ngi,” u la bynrap.
Halor kane ka jingjia, na ka liang u Bah Kharbhih u la ong ba ka dorbar shnong ka kyntu ïa ki bor ba dei khmih ban shim da ka kam kaba tyngeh pyrshah ïa kane ka jingleh khnang ban ïada na kiwei pat ki jingjia hadien habud bad ban ïada ïa ka jingshngaiñ jong baroh ki nongshong shnong.
“Ngi kyrpad ruh ïa ki paidbah ban don ka jingkitkhlieh khnang ban pynthikna ba ki surok jong ngi kin long kiba shngaiñ bad kiba ai jingïada ïa manla uwei pa uwei u briew. Ngi kyrpad ruh ïa ki bor ba dei peit ban pynthikna ba ka dei ban don ka jingpynshisha kaba thikna haba ai ïa ki laisen ñiah kali da kaba khmih bha ïa ki buit bad ki sap ñiah kali bad ban pyntreikam da ki kyndon kiba pyrkhing bad ban shim ka rai kaba tyngeh ïa kum kine ki kam ñiah kali kulmar. Ka long ruh kaba donkam ban buh da ki road safety measure, ban pynlong ki jingpynsngewthuh paidbah shaphang ka jingma haba ñiah sted ïa ki kali, nangta ban pynthikna ba ki aiñ pyrshah ïa ka jingñiah kali hapoh ka rta kaba 18 snem bad ka jingpyndonkam bakla ïa ki jingdih pynbuaid ki dei ban treikam bha,” u la bynrap.