Shillong, Lber 25: Ka state BJP ka la pynrem jur ha kaba ïadei bad ka jingshah thombor ka ïing u Numal Momin Deputy Speaker ka Assam Assembly bad ka la dawa ba dei ban don ka jingtohkit ki kam runar ha kaba ïadei bad kane ka jingjia pyrshah ïa Nurul Huda bad dei ban aiti ïa ki jingpynshitom sha ki bor ba dei peit ha kaba ïadei bad kane ka kam khnang ba kin ym wan jia shuh nangne shakhmat.
Ha ka kyrwoh khubor na ka liang jong u President ka BJP u Rikman G Momin u la ong, “U Numal Momin u la dei u nongmihkhmat jong ki paid Garo bad u dei u dkhot ki Christian ha ka Assam Assembly bad kane ka long ka jingleh kaba la ktah bha ïa ka jylla baroh kawei. U Momin u la dei u briew ba baroh ki burom ym tang ha Assam ne Meghalaya, hynrei da ki briew ha kylleng jong kane ka thaiñ shatei lammihngi. Kane ka jingshah ktah kti jong u ka la ktah bha ïa ka imlang sahlang bad kaba ym lah ban pdiang.”
“Ngi sngew kyndit ban ïohi ba ka Congress party, kaba ym lah satia ban sangeh ïa ki jinghylla jong ka na ka bynta ki riewlum, hynrei ha kane ka jingjia ka la sngap jar jar. Ka Congress party ka la sngap jar halor kane ka jingleh jong u Nurul Huda ha kaba kane ka pyni ïa ka jingleh shilliang jong ka Congress sha ki paidbah kane ka thaiñ riewlum bad khamtam eh ïa ki paidbah ka jylla Meghalaya. Nga kyrpad ïa baroh ki nongshong shnong ka jylla ba kane ka jingjia kan sa ktah bha ïa ka Congress bad ki paidbah kin sa ai ka jubab kaba biang bha halor kane ka bynta khamtam ha ka elekshon ban wan,” u la ong.
“Nga kyrpad ïa ki pulit ka Assam ba kin shim khia bha halor kane ka kam pyrshah ïa u Nurul Huda bad ban pynïoh ïa ka hok sha u briew uba la shah ktah halor kane bad ba kum kine ki kam kidei ban kut noh na ka bynta baroh,” u la bynrap.
