Mawkyrwat, Lber, 25: U District Magistrate jong ka South West Khasi Hills District Bah B. Mawlong u la pynmih ïa ka hukum katkum ka kyndon 163 BNSS hadien ba la ïoh jingtip ba ka don ka jingthang ïa ki khlaw ki btap ha kylleng ki jaka bapher bapher hapoh ka South West Khasi Hills District.
La sakhi ba ka jingthang ïa ki khlaw, ki jyntang bad ki phlang kiba jrong ka pynjulor shibun ïa ka mariang, ka pynjaboh ïa ka lyer bad ka pynjot ïa ki jingthung jingtep bad ki khlaw. Nalor kata, kine ki jingpluh ding ki buh ruh ka jingma kaba khraw ïa ki jingim bad ki mar ki mata.
Ban ïada ïa ka mariang, u District Magistrate u la mana ban thang ïa ki phlang, ki dieng, bad kiwei kiwei ki tiar kiba lah ban kem ding ha ki khlaw ki btap, ki jaka phlang, ki jaka jngohkai, ki kper, ki jaka thung jingthung, ki jaka ba rben, bad kiwei kiwei ki jaka kiba lah ban shah ktah ha ka ding hapoh ka District.
Namar ka jingdonkam ba kyrkieh jong ka jinglong jingman ha ka mei mariang ka hukum kan treikam noh mardor tat haduh ban da pynbna da kumwei pat.
Ki bor synshar district ki la kyntu ïa baroh ki paidbah nongshong shnong ban kohnguh bad shim jingkitkhlieh ïa kane ka jingbthah ban ïada na ki jingjia ba sngewsih bad ban ïada ïa ka mariang.
Kiba pynkheiñ ïa ka aiñ kin ngat katkum ki kyndon jong ka aiñ ba la pynjari.
