Khliehriat, Naitung, 13: Ki bor synshar jong ka East Jaiñtia Hills District, hapoh ka jingpeit jong u Additional Deputy Commissioner ka East Jaiñtia Hills, u Bah J.Shylla, ha ka sngi Palei ki la pynpra sa kawei ka Druk Fuel Limited kaba don ha Nongjri kaba hap hapoh ka Elaka Sutnga ba la tei beaiñ khlem pat ïoh ïa ka Consent to Established (CTE) na ka Meghalaya State Pollution Control Board (MSPCB). ïa kane ka karkhana la pynpra da kaba shu pynbthei da ki bom ha ka por 3:00 baje nohphai sngi.
Ha ka por ba la pynbthei ïa ki bom ha kane ka karkhana la sakhi lang da ka kynhun na ka ophis jong u Superintendent of Police, East Jaiñtia Hills District, ki nongtrei na ka tnat Meghalaya State Pollution Control Board (MSPCB) bad na ka tnat District Commerce and Industries Centre (DCIC).
Ka jingpynpra ïa ka karkhana ka long ruh katkum ka hukum lane ka Order No:EJHD/GENL.261/COKE/Pt.IV/2023/151 Dated 7th July, 2023 bad ka Order No: EJHD/GENL.261/COKE/Pt.IV/2023/152 Dated 11th July, 2023, ba la dep pyllait da u Deputy Commissioner ka East Jaiñtia Hills District.
Ki bor synshar district kin nang ïai bteng shuh shuh ïa ka jingpynpra ïa kiwei kiwei ki coke plant beain kiba dang don hapoh ka district kiba la tei beaiñ khlem pat ïoh ïa ka CTE.
