Shillong, Jymmang 06 : Da ka jingshimkhia sted jong ka Sorkar Jylla, haduh 66 ngut ki samla pule na Meghalaya, kiba pule ha ki jaka pule bapher bapher ha Imphal, ka Nongbah jong ka Manipur, kila wan poi suk hynnin ka sngi ha ka Lokpriya Gopinath Bordoloi International Airport ka nongbah Guwahati. Mynta ka sngi Saitjain pat sa 17 ngut ki la wan poi na Manipur ha kane kajuh ka kad liengsuiñ. ïa kiba sah 165 ngut ka sorkar ka la pynkhreh ban pynpoi sha ka jylla hapoh ka 10 tarik mynta u bnai. Kumta baroh kiba la wan phai kat haduh mynta ka sngi ki long 86 ngut.
ïa kine ki samla pule la pdiang da ki Heh Ophisar ka Sorkar Jylla bad ki kynhun Sengbhalang ka Jylla. La wan ïalam ïa ki sha Jylla da ki bos bala pynkhreh da ka Sorkar Jylla. Kam pher shano ba ki shong, ïa kine ki samla la pynpoi sha Ri-lum Garo bad sha nongbah Shillong.
U Myntri Rangbah ka Jylla u Conrad K Sangma ha ka sngi Palei u pyntip ba ki don kumba 200 ngut ki samla na Jylla Meghalaya kiba pule ha Manipur, kham bun eh ha Imphal. Ula ai ka jingkular ba ka Sorkar kala shim ïa baroh ki sienjam ha kaban pynthikna ba kine ki samla kin wanphai noh kham kloi da kaba suk bad ba shngaiñ sha Jylla Meghalaya.
Ka jingkulmar bad jingïaumsnam kala khie ha ka janmiet sngi Balang ha Manipur, kaba la nang jur da ka jingïaleh markylliang hapdeng ki paid riewlum khamtam eh hapdeng ka jaidbynriew Meitei bad ki Kuki, hadien ka rally Tribal Solidarity March bala pynlong da ka ATSUM ban pyrshah ïa ka jingdawa jong ki Meitei ban ai jingithuh kum ki Scheduled Tribe.
Haba ïakren bad u Nongai khubor uwei na kine ki samla pule ula ong ba ki shipai Indian Army kila synran ïa ki naduh na ki hostel shaduh ka Imphal Airport, ha kaba kila ïakynduh ïa ka Kynhun bala phah da ka Sorkar Meghalaya ba la ialam da I Myntri ka Koit ka Khiah Kong Ampareen Lyngdoh.
“Kane ka dei ka sien ba nyngkong ba ngin mad ïa kum kane ka jingjia….ngi la ju ïohi tang ha ki phlim bad ki lad pathai khubor kum ka thma Ukraine bad Russia hynrei mynta ngi sa sakhi da la ki jong ki khmat” ula ong.
“Ka jinglong jingman kala shongsyier bha, ngim nang thiah shuh mynmiet, kala don ka jingïawiang ding ïa ki kali, ki ïing kat shaba phai, shabar ka phyllaw ka jaka pule bad wat ha ka Nongbah Imphal baroh kawei.Ngi la sheptieng bha ïa kaei kaban jia ïa ngi…ym don nong pahara satia ïa ka campus jong ngi…ngim nang shuh ban thiah mynmiet” ula ïathuh ïa kaei kaba jia.
Iwei pat I samla pule, ila ïathuh ba baroh ki samla pule ki la rit mynsiem haba ïoh jingtip ïa ka jingïakulmar bad ïohsngew ïa ka jingïather kuli bad jingbthei bom hajan ka jaka ba ki sah.
“Kumba 9 baje eiei (ha ka 3 tarik Jymmang 2023), ngi la ïasah ha ka jaka kaba jur ka jingkulmar..kala sdang kynsan kynsan bad hadien la mih sa ki jingïather kuli, ka la don ka jingbthei bom, kawang bom bad hangne ngi la sdang ban rit mynsiem…namar ka jaka kaba ka college jong ngi ka don bad kumjuh ruh ka hostel, ka dei kaba tawiar da ki riewlum, kumta ka jingkulmar ruh ka jur bha ha kane ka jaka” ila ong.
“Baroh shimiet naduh ba ka sdang haduh mynta, ngi la shu ïa im hapdeng ka jingtieng…ngim tip satia ïa kaei ka ban jia hadien. Ngi la shu pynkhreh ïalade, lum lang ïa ki kot ki sla ba donkam, ïa baroh ki tiar ba donkam bad ngi la shu pynkhreh beit ba lada jia kumno kumno ngin shu ïaphet beit” ila ïathuh.
I ïathuh ruh ba bun ki samla pule kila rit mynsiem biang hadien ba ki poi ha kad liengsuiñ namar ka liengsuiñ kala slem. Kila rit mynsiem da kaba pyrkhat ba ka Sorkar kam shym la shimkhia satia ban leit ïarap ïa ki, hynrei hadien la ïoh jingtip baka don ka jingslem ban ïaphah ktien namar ka jingkhang internet da ka Sorkar Manipur.
