Nongstoiñ, Ïaïong, 18: Shuwa ba ka election ban jied ïa ki nongmihkhmat sha ka Khasi Hills Autonomous District Council, ki paitbah jong ki san tylli ki polling station jong ka Mawthadraishan ba kynthup ïa ka Upper Laitkseh, Lower Lasitkseh, Langlew, Marngor bad Phyllut, ki la dawa ba shuwa ka MDC Election ban wan ba ka sorkar ka dei ban pynhap lang noh ha ka Nongstoiñ constituency. Namar lada ha ka MDC Election ka hap kawei ka constituency bad ha ka MLA ka hap ha ka wei pat ka constituency, ki paitbah ki shem jingeh haduh katta katta ha kiba bun ki liang khamtam eh ha kaba ïadei bad ka jingpyntrei ïa ki skhim sorkar ha ki shnong ki thaw.
U bah Sherman Sohshang sordar barim ka shnong Marngor haba ïakren bad u nongthoh khubor u la ong ba ki paitbah jong kitei ki san tylli ki polling station, ki la angnud haduh katta katta ba kitei ki polling staion ki dei ban hap lang ha Nongstoiñ kumba ka long ha ka MLA.
U la ong ruh ba la arsnem kynthih haduh mynta bun bah ki skhim sorkar ba ki paitbah jong kitei ki shnong ki dei ban ïoh kim shym poi satia namar ba u MLA bad u MDC kim ïa dei lang na kajuh ka constituency. U la ong ruh ba wat ka jingpyntrei ïïa ki skhim shispah sngi kaba dei ka pisa ba la mang kyrpang da ka sorkar pdeng ruh ym shym la ïoh shuh ban pyntrei.
U bah Sohshang u la ong ruh ba na ka liang ki paitbah ki la kyntu ruh ïa u bah Gabriel Wahlang u MLA ka Nongstoiñ u ba dang dei ruh u MDC, u bah Sahakliar Warjri MLA ka Mawthadraishan bad u bah Jambor War MDC ka Mawthadraishan, ba kin ïa kynduh lang ban ïa pyrkhat sani halor katei ka jingkwah jong ki paitbah jong kitei ki san tylli ki polling station kiba don haduh khyndai tylli ki shnong.
Namar lada kitei ki MLA bad ki MDC kin pynsngew sha ka sorkar ïa ka jingeh ki paitbah khlem artatien ka sorkar kan sngap bad kan leh ïa kaba donkam. Nalor kata la ïoh jingtip ruh ba ki katto katne tylli ki shnong kiba hap ha ka Mawlangsu area kum ka Nongriat, Nginïong Mawlangsu, Nongbodum, ba ha ka MDC Election ki lah ban ngat noh ha ka Rambrai Jyrngam. Tangba ym pat lah ban pynthikna la ka lah ne em ban long kumta.
