Shillong, Risaw 20 : U nongïalam rangbah ka BJP bad MLA ka Pynthorumkhrah, Bah AL Hek, ha ka Sngi Ba-ar u la ong ba um khmih lynti ïa kano-kano ka jingkylla ha ka Sorkar Jylla bad um don jingthmu lane ka jingkwah ban shimti ïa ka shuki Myntri Sorkar ha kane ka samoi.
Kane ka jingkren jong u ka wan hadien ba ka jingdon jong ki MLA ka BJP ha ka Ïingdorbar Thaw Aiñ ka la kiew na ka ar ngut sha ka 10 ngut, hadien ba phra ngut ki MLA barim jong ka UDP ki la pynïasoh sha ka BJP.
Na ka liang u Bah Hek haba jubab halor ka jingkylli kumno un leh lada la pynrung ïa u ha ka shuki Myntri, ka jubab kaba u ai ka long, “Ngam khmih lynti ïa kano-kano ka jingkylla ha ka Sorkar, hynrei kata ka shong ha ka bor bad ka rai jong u Myntri Rangbah.”
Ha kajuh ka por u la ong ba u kwah ruh ban pynshai ba um don kano kano ka jingkwah ba un shimti ïa ka shuki Myntri mynta ka samoi.
“Nga kwah ban ong shai mynta ba ngam kwah ban long Myntri ha kane ka samoi. Ngin sa peit ha ka eilekshon ban wan ha u snem 2028, bad tang hadien kata ngin sa shim rai,” u la ong.
U la bynrap, “Wat lada tyrwa ïa nga ban rung sha ka kynhun Myntri, ngan ym pdiang. Nga kwah ban bteng ban long kumba nga long mynta bad ïakhun ban pynkhlaiñ ïa ka kynhun treikam jong ka party. Kata ka dei ka jingthmu jong nga.”
