Nongpoh, K’Lyngkot 05: Ki paid Garo ba shong ba sah haka thaiñ Killing ha Ri-Bhoi District mynta ka sngi kila pynlong ïaka prokram kyrpang ban pynpaw pyrthei ïaka kolshor tynrai bad ka riti ka dustur jong ki paid Garo lyngba ki jingïakop bapher bapher.
Ia kane ka prokram la pynlong haka shnong Bara Killing da ka kynhun Achik Cultural Club Killing ha kaba u Bah Sosthenes Sohtun Myntri sorkar ba dei peit ïaka tnad C&RD ba dei ruh u MLA bad MDC ka Jirang Constituency u la leit ban shim bynta kum u kongsan haka jingdonlang ki riew pawkhmat naki paid Garo kiba shong ba sah ha katei ka thaiñ.
Lyngba kane ka prokram lah ruh ban sakhi ïaka jingriewpsah ka shad ka rwai tynrai bad ki riti ki dustur bad ki kolshor tynrai jong ki paid Garo kiba ki dang pynim bad pynneh pynsah haduh mynta mynne.
Haba phai sha ki jingïakop ka shnong Bara Killing, ka la wan ha ka kyrdan kaba nyngkong, ka shnong Ampher (Assam) ha ka kyrdan ba-ar bad ka shnong Noksikgittim ha ka kyrdan balai.
Haba kren ha kane ka sngi naka liang u Bah Sosthenes Sohtun kum u kongsan u la pynpaw ka jingsngewkmen ban iohi ba ki paid Garo ki long kiba tylli ban pynim bad pynneh pynsah ïala ka tynrai bad ai ruh ka jingïaroh ïaka A-chik Cultural Club Killing, kiba la shimkhia ban pynlong ïa katei ka prokram, kaba long kum ka jingpynneh pynsah ïala ka tynrai bad ki riti ki dustur bad khamtam ban wanrah ka jingïatylli bad long kum shipara hapdeng ki paid Garo kiba shong ba sah haki shnong bapher bapher ha katei ka thaiñ Killing.
