Mairang, Naitung 2: Kum shi bynta ban ïada na kino kino ki jingjia ba sngewsih ha kine ki por aiom slap, na ka liang ka Deputy Commissioner, Eastern West Khasi Hills District, Mairang, ka la pynmih ïa ki jingbthah kiba dei ban leh bad ki bym dei ban leh ha kine ki por aiom slap, na ka bynta ka jingshngaiñ jong ki nongshong Shnong ka Eastern West Khasi Hills District.
La kyntu ïa ki nongkhwai dohkha, ki nongshonglieng bad ki nongjngoh kai pyrthei, ba ki dei ban sngap bha ïa ki jingmaham ba la pynmih da ka IMD lane na ka SACHET app, ha kaba ïadei bad ka jinglong jingman jong ka suiñbneng.
Dei ban leit khwai dohkha tang ha ki jaka kiba shngaiñ, pyndonkam da ki life jacket ne kino kino ki tiar ai jingïada, kiar na kaba ïaid ha ki maw kiba lah ban syntuid, peit thuh bha ïa ka jingheh jong ka um bad ka jingtuid sted jong ka, dei ban rah lang ïa ki tiar ai jingïarap kum ka first aid kit, ki torchlight bad pyntip sha kiba haïing ne ki paralok ïa ka jaka ba ban leit khwai dohkha.
Shuh shuh, dei ban kiar na ka jingleit khwai ha ka por ba jur slap ne ban dih kyiad ha ka por khwai dohkha. Na ka bynta ki nongshonglieng, la bthah ban shong tang ha ki jaka ba shngaiñ ne ha ki jaka jngoh kai pyrthei, dei ban peit bha ïa ka lieng bad ki tiar, phong ïa ki life jacket, dei ban shong katkum ka jinglah jong ka lieng ban kit, dei ban kiar na kaba shonglieng tang shu la kem dum, ne ha ka por ba ai jingmaham, ne jur lyer lane ban dih kyiad ha ka por shong lieng.
Shuh shuh, la bthah ïa ki trai jaka kiba don ïa ki jaka jngohkai pyrthei, ba ki dei ban buddien ïa ki jingpynbna shaphang ka jinglong jingman ka suiñbneng. Ym bit ban shah ïa ki nongwan jngohkai ban leit sharud ki wah kiba heh, lane ki kshaid ha ka por jur slap. Dei ban buh ïa ki map kiba shai bad ki dak jingma, ki dang rung bad dak mih.
La bthah ruh ban jurip bad maramot ïa ki jingkieng, ki jingker bad ki jaka lehkai, dei ban buh ïa ki nongpyllait im kiba la shah pyntbit bad ki first aid kit. Lada jia ba ki don ki jingmaham na ka liang ka IMD ha kaba ïadei bad ka suiñbneng. Dei ban khang ïa ki jaka jngohkai bad wat pynshlur ïa ki nongjngohkai ban shon dur hajan ki jaka ba long thmit ne ki jingker bym skhem ne hajan ki um kiba tuid stet.
Ki nong jngohkai pyrthei lane tourist, ki dei ban kiar na kaba leit kai sha kino kino ki jaka kum ki wah ne kshaid ha ka por ba jur slap. Dei ban bud ïa ki map bad kohnguh ïa ki dak ki shin ba lah buh ha ki jaka bad ban kohnguh ïa ki jingmaham. Dei ban pyntip ïa ka jingleit jingwan sha kiba haïing hasem bad ban leit kai tang sha ki jaka ba long shngaiñ.
Na ka bynta ki jingïarap ha kano kano ka por ba donkam kyrkieh, la kyrpad ïa ki paidbah ban pyntip ne phone ha kine ki number Helpline Number 112, Police Control Room, Mairang 7629981814, District Control Room 03657-282254/1077 lane ha u BDO Mairang 08981591631 bad BDO Mawthadraishan 09774126727.
