Riangdo, Nailar, 17: Hadien ka jingujor ka Mawshynrut Mouth Movement (MYM) ha ka 6 tarik Nailar, u Inspector jong ka Legal Metrology West Khasi Hills, u la phah jingthoh sha baroh ki nongshong dukan marbam ha West Khasi Hills.
Katkum ka hukum ba la pynmih, u Inspector jong ka Legal Metrology West Khasi Hills la ong ba la ïoh pdiang ïa ki jingujor na ki nongshong shnong ba ka jingkhia jong ki mar ba la song lypa, khamtam u khaw ha ki byrni, ka duna ïa kaba la mynjur da u nongdie, khamtam ha ki jingsong bym don jingthoh ban pynshai, kumta ka pynkheiñ ïa ka hok u nongthied.
Katkum ka kyndon Rule 6 jong ka ain hapoh ka Legal Metrology (Packaged) Commodities Rule 2011, baroh ki mar ba lah song lypa ki dei ban don ka labeling kum ka ‘Address of the Manufacturer & Packer, Name of product, Generic name of Product, MRP, Net Quantity, Month & Year of Packaging, Best before, Consumer Care Number, etc’.
Baroh ki retailer/wholesaler ba die ïa ki mar ba lah song lypa, khamtam u khaw ha ki byrni ne packet ki dei ban buh ka tiar jingthew ha ka jaka kaba I bit, na ka bynta ka jingmyntoi u nongthied bad u nongthied u lah ban thew ïa ka jingkhia u khaw ha kata ka tiar thew, khnang ba u nongthied un ïoh ïa ka mar katkum ka jingkhia ba lah mynjur da u nongdie.
Kata ka tiar thew ka dei ban don lang bad ka ‘Certificate of Verification’, ba lah issue da ka Department ban pyntikna ïa ka jingbiang ka tiar thew bad ki dei ruh ban renew man la ka shi-snem/ar-snem.
Ki Nongthied ki dei ban pyntip ne phah jingujor sha kane ka office lane don ne ïoh don ki ba thew duna, pynkylla ïa ki tiar thew, die palat ïa ka MRP, pynkylla ne pynjot ïa ka MRP etc khnang ba ka department kan leh ïa kaba donkam, ong ka hukum ba la pynmih dang shen.
