Pynmih da kawei ka result ba don ki kyrteng, roll no bad ruh ki mark – dawa ki Nos bad KSU na ka Health Minister

Shillong, Nailur 30 : Ka kynhun jong ki nos ha ka jylla ryngkat ka jingsynranlang ki nongïalam jong ka Khasi Student’s Union bad Jaintia Student’s Union ha ka sngi Nyngkong ki la dawa na ka Myntri ka tnad ka Koit ka Khiah, Dr. M Ampareen Lyngdoh ban pynmih biang da kawei pat ka result kaba ïadei bad interview kam jong ki nos kaba la dep ha ka 21tarik Nailur mynta u snem.
Haba kren bad ki lad pathai khubor, u nongïalam jong ki nos, Bah Lurstep Nongrum u la ong, “Hadien ka jingïakren, ngi la poi sha ka rai ban pynmih biang ïa ka result kaba long naduh roll number 1 ter ter bad baroh 6000 tam kiba aplai. Dei ban pynmih lang ïa ka kyrteng bad ruh ka jingïoh ïa ki mark jong kito kiba wan thoh ïa ka eksam,” ong utei u nongïalam jong ka kynhun ki nos.
Nalorkata, u ong ruh ba hadien ba la dep ban pynmih ïa ka result ki dei ruh ban ai por pat 10 sngi da kaba buhteng shwa ïa ka physical verification jong kito ki kyrtong kiba pass. “Kumta ki ai por 10sngi ïa ngi ban ujor sha ka Grievances Cell lada ngi don ka jingartatien ïa ka jingïoh mark khnang ba yn lah ban peit biang,” u la bynrap.
Kumta, ha kaba kut, u ong ba hadien ba la kut katei ka 10 sngi ki sa peit pat kaei ka rai jong ka sorkar halor kitei ki jingujor na ki nos.
“Ha ka sngi kaba 11 ngin sa wan ban kynduh bïang, ban tip kaei kaba kin leh pat halor kitei ki jingujor kiba wan na ki nos kiba ngin sa phah nangne shakhmat,” u la ong.
Ha shwa kane, u Bah Lurstep u la ïathuh ba ki la pynpaw ruh ïa ka jingkyndit bad ka jingshaiong halor ka jingmih arsien jong ki roll number ha katei ka result jong ki kam nos.
Lah ban kdew hangne ba ka tnad ka koit ka khiah ka la pynbna ban pyndap ïa ki 164 tylli ki kam staff nurse bad 78 tylli ki kam ANM ha kaba ïa ka written examination la dep ban pynlong ha ka 21tarik u Nailur.
Halor kane, na ka liang u Chairman jong ka KSU Employment Monitoring Cell, Samla Reuben Najiar u la pynpaw ba ki la lap ba ki don bun ki jingbakla ha kane ka result kaba la pynbna ha ka 28tarik Nailur haduh ba ki samla ba aplai ïa katei ka kam ki la kulmar lut.
U Samla Reuben u la ong ba ki banjur ba ki kwah ban ïohi ba ka rukom thungkam ha ka jylla ha kano kano ka kam kadei ban long da ka lynti kaba khuid bad kaba don jingshaniah.
Katba na ka liang u General Secretary ka JSU, Samla Treibor Suchen u la kynthoh da kaba ong ba ka sorkar ka pynleit jingmut tang ha kaba pynlong ïa ki concert da kaba kheinsting pat ïa ka rukom thungkam thungjam ïa ki samla.