Nongpoh, Naiwieng, 19: Da ki hajar ngut ki paidbah ki la tuid sha madan Kurkalang mynta ka janmiet jong ka sngi u Blei, kaba dei ka sngi ba la pynkut noh ïa ka tamasa Cherry Blossom na ka bynta sakhi ne kwah ban ïohi ïa ki nongput ki nongtep, ki nongrwai kiba wan ban pynkhih win mynta ka janmit khamtam u nongrwai ba paw ka pyrthie u Ronan Keating.
Kum ban pynkynmaw, kane ka tamasa cherry blossom ka dei ka tamasa kaba la pynlong haduh 3 sngi lynter, ha kaba ha ka sngi plie ka tamasa la hap ban pynsangh noh na ka daw ka jingktah ka bor mariang, hynrei kane ka tamsa ka la ïaid beit ïaid ryntih ha kine ki sngi bad khamtam mynta ka sngi ba la pynkut noh ïa kane ka tamasa bun ki paidbah ki ap khmih lynti ban ïohi noh ïa ka jingwai jong u Ronan Keating, uba dei uwei na u khlur nongrwai ha ka pyrthei.
Ki nongrwai bad ki nongshim bynta mynta ka sngi ba la pynkut noh ïa ka tamas ki kynthup naduh u nongrwai barim ka Boyzone, u Ronan Keating, uJonas Blue, Lou Majaw, Blue Temptation, Da Minot, Nokpante, Rhem, Favian, Wanjop Sohkhlet, Banrap, Youngg Nate, Meban, Lamphrang, bad u Toshan.
Kumba la sakhi mynta ka sngi, da ki hajar ngut ki briew kiba ieit ïa ka put ka tem bad ka rwai ka siaw ki la poi sha madan Kurkalang na ka bynta ban ïoh sngew ïa ki sur babang ba thiang jong kitei ki riew donsap kiba pynkih win mynta ka janmiet ha ba la pynkut noh ïa kane ka tamasa.
Ki jingshisha ki paw, ba ki paidbah ruh ki la tuid sha katei ka jaka, ka dei ka jingdheng kali kaba la jur bha haba poi sha katei ka jaka bad wat la katta ruh kiba bun ki kwah ban poi noh sha katei ka jaka na ka bynta ban sakhi ïa kitei ki riew donsap ha ka put ka tem bad ka rwai ka siaw.
Nalor kitei ki riew donsap kiba la pynkhihwin ha kane ka janmiet bad ki riew paidbah kiba la wan ban sakhi kynthup ruh ïa ki Myntri Sorkar naduh u Bah Paul Lyngdoh, u Bah Kyrmen Shylla, u Bah Sniawbhalang Dhar bad u Bah Shakliar Warjri ruh ki la wan ban shim bynta na ka bynta ban sakhi ïa kane ka sngi ba la pynkut noh ïa ka tamasa Cherry Blossom ha Madan Kurkalang.
