Shillong, Naitung 14: Ka Department of Law jong ka North-Eastern Hill University (NEHU), ryngkat bad ka Indian Council of Social Science Research – North Eastern Regional Centre (ICSSR-NERC), ka la pynlong ïa ka Workshop halor ka “Three New Criminal Laws 2023” hapoh ka skulbah NEHU.
La pynlong ïa kane workshop, da ka jingthmu ban ai jingpynshai bad ban sngewthuh halor ki lai 3 tylli ki aiñ kiba thymmai kiba la pyntreikam dangshen ha baroh kawei ka ri India.
Ka Director General of Police ka Meghalaya, ka Kong I. Nongrang, kum ka kongsna ka la plie ïa kane ka jingïalang bad ka la ai ïa ka jingbatai kaba bniah halor kitei ki 3 tylli ki aiñ kiba thymmai bad ka rukom treikam ka jong ki.
Ka Kong Nongrang ka la banjur ïa ka jingkongsan ba ki pulit kin pyndep ïa ka kamram ka jong ki bad kumjuh ban long kiba la pyntbit ïalade katkum ka jinglong jingman ha kaba ïadei bad ka jingmih jong ki kyndon jingbthah kiba thymmai bad ki Standard Operating Procedures (SOP) ban pynthikna ban ai ïa ka hok.
Nalor kane, ka la pynpaw ruh ïa ki jingeh bad ki jingtynjuh kiban mad na ka jingkiew sted ki kor teknoloji kum ka Electronic Documentary Evidence ha kaba ïadei bad kitei ki aiñ kiba thymmai.
Ïa kane ka jingïalang la pynïaid da u Professor D.K. Nayak, Vice Chancellor In-Charge ka NEHU.
Ha kane ka workshop ha ka bynta kaba nyngkong la pynïaid ïa ka jingïalang da ka Kong N. Nongkynrih kaba long ka Director jong ka Directorate of Forensic Science, Shillong ha kaba la ïoh ïa ka jingkren na u Nongïasaid aiñ u S.P. Mahanta, Ronak Kumar u Public Prosecutor jong ka CBI, u Bipul Das, DSP Crime Branch bad u Rajesh Kumar Jaiswal na ka NEPA.
Kine ki nongkren kila ai ka jingbatai kaba bniah shaphang ka rukom treikam bad shaphang kitei ki aiñ kiba thymmai.
Ha ka wat ka baar, ïa ka jingialang la pynïaid da u Dr. R.K. Mishra bad la ïoh ïa ka jingkren bad ka jingbatai bniah na ki riewshemphang kiba kynthup ïa ka Dr. Daiahunlin Mawlong, Dr. Arpita Singh, Dr.Umeshhwari Dkhar bad Yophika Grace Thabah.
