Shillong, Kyllalyngkot 12: Kum shi bynta jong ka jingpynkhreh ban wan ka President ka ri ka Droupadi Murmu, ka Tnad Pynlip ding hynne ka sngi Thohdieng, ka la pynlong ïa ka Mock Drill ha Raj Bhavan Shillong, ïa kaba la wan ban ïashim bynta da ki ophisar bad ki pulit ka jylla.
ïa kane ka Mock Drill la pynlong hapoh ka jingpeit jingkhmih jong u Lat ka jylla u Phagu Chauhan, uba la khmih hi da lade ba kane ka Mock Drill ka dei ban long kaba ïaid beit ïaid ryntih.
Ki pulit jong ka Meghalaya Fire Service, ki la pyndonkam ïa la ka buit ka sap bad ïa ki tiar katkum ka juk kaba mynta ha ka ban ïaleh ban pynlip ïa ka ding, ban pynlait im ïa ki lanot bad ban ai jingsumar kaba mardor.
Nalor kane, ki la ai jingbatai bad jinghikai ruh ïa ki nongtrei hapoh Raj Bhavan kumno ban leh lada jia ba ka don ka jingpluh ding bad kumno ban pyndonkam ïa ki tiar ki tar kiba lah ban long kiba kordor haba mih kano kano ka jingpluh kaba kynthup ruh ban peit bad khmih bniah ïa ki waïar ding kiba lah ban lait, ki tiar pynlip ding bad kiwei kiwei.
