Pynlong ka Seng IRSSCC ïa ka seminar halor ka mat kaba ïadei bad ka sengkam sengjam

Shillong, Nailar : Ka Seng Ieng Rasong Sports Social And Cultural Club (IRSSCC), Shillong ha u kyrwoh lyngba u Bah S. Lyngdoh, Publicity Secretary da kane ka pyntip ba ka Seng ha ryngkat ka jingïatreilang bad ka CMYDS, District Planning Office, EKHD, Shillong kila pynlong ia ka Seminar Programme Cum Worshop halor ka mat, “Self Employment through collective efforts,” ha ka 22 tarik mynta u bnai hapoh Community Hall, Nongmensong Shillong.
Ha katei ka sngi ïa ka prokram la pynïaid da u Bah Dapmon Khonglah, Deputy Rangbah Shnong ka Dorbar Shnong Nongmensong, bad la ïoh ruh ïa ka jingkren plie na u Bah D. Lamare, General Secretary jong ka Seng.
Haba kren kum u kongsan ha ka jingïalang, u bah AL Hek, MLA ka Pynthorumkhrah ula pynpaw halor ki jingeh ha ka liang ka ioh kam ioh jam ha kane ka juk kaba mynta, abd ula pynshlur ïa ki samla wad kam ba kin ïeng hala ki jong ki kjat bad ban trei shitom ha kino kino ki kam kiba ki pyrshang ban trei.Kumjuh na ka liang u Bah Samborlang Diengdoh uba long u Symbud Kongsan ha kane ka sngi ruh ula kren halor ka mat kaba ïadei bad ka jingkyrduh kam bad halor ki lad ki lynti ban seng kam seng jam.
Ha kane ka prokram la ïoh ruh ka jingkren na u Bah HS Kharpran u ophisar bala shongthait jong ka tnat Soil & Water Conservation, Shillong, uba la ban jur shaphang ki Self Help Group ba ki dei ban trei shitom ha kino kino ki kam ba la bynshet ha ki.Kumjuh na ka liang u Branch Manager ka MCAB, Nongmensong Branch, Shillong ha ka jingkren uba la ban jur ïa ki Self Help Group bad ki samla wad kam ba kin wan sha ki Bank na ka bynta ban ïoh ïa ki jingiarap bad kumno ban seng ia ki kam lajong.
Kiwei pat kiba la aijingkren ha kane ka sngi ki kynthup ia I Kong L.Khongrymmai Manager ka Ophis District Commerce Industries Center, EKHD, Shillong iba la kren shaphang ki skhim bapher bapher kum ka PMEGP bad kiwei pat.