Pynlong ka MSOA ïa ka jingïalang ba nyngkong ban pynkhreh ïa ka 5th Sohra International Half Marathon

SHILLONG, Jylliew 18: Ka Meghalaya State Olympic Association (MSOA) hynne ka sngi Palei (18 tarik Jylliew) ka la ïoh ban pynlong ïa ka jingïalang kaba Nyngkong ha Ophis treikam u SDO ka Sohra, ban ïa kren halor ka jingpynkhreh ïa ka sienjam kaba san (5th) jong ka Sohra International Half Marathon 2026 kaba la buh ban pynlong ha ka 04 tarik Nailur 2026.
Ïa kane ka jingïalang la pynïaid da u M Challam MCS ha ka jingïadon lang u Working President ka MSOA bah John F Kharshiing, General Secretary bah Finely L Pariat, Deputy Director ka tnad Sports and Youth Affairs bah Paia B War Nongbri, ki ophisar, u Adiel R Kynta MCS, u PM Syiem SDPO, ki ophisar na ka tnad Pulit, ka ka tnad ka Koit ka khiah, Pwd, tnad jngohkai bad kiwei kiwei kynthup ruh ïa ki Sordar, Sirdar, Rangbah shnong na Laitsohpliah haduh Mawsmai.
Ha kane ka jingïalang la ïakren ïa ka jingpynkhreh bad jingpynbeit ban pynlong ïa kane ka Marathon kaba jop, kumjuh ruh ïa shibun ki jingmut bad ki buit kumno ban pynbha shuh shuh ïa ka jingpynïaid ïa kane ka jingïakop.
Ka jingïalang ka la rai ban ïakynduh biang ban bishar bñiah ïa ka jingpynkhreh shuwa ban pynkut da ki kyntien ai khublei na u Chairman ba pynïaid ïa ka jingïalang.