Jowai, K’Lyngkot 18: Ka Khasi Students’ Union (KSU) Wapung Unit ha ka 17 tarik kyllalyngkot 2025 kala pynlong ia ka jingpynkup burom ia ki khynnah skul bala pass bha haki eksam jong ki jong u snem 2024, kaba la tip kum ka 5th U Woh Tep Kyndait Academic Award 2024 ïa kito ki khynnah haki kyrdan pule jong ki kata ha ka klas 10, klas 12 bad degree bad kiwei ki jait Course kum ka dak ban pynshlur ban kyrkhu kyrdoh bad kitbok kitrwiang ia ki ha ka liang ka pule puthi bad ha ka jingim jong ki ban kin nangkiew shaphrang.
Ki khynnah ba ïoh ïa kane ka Khusnam ki kynthup ki khynnah skul na ka Shnong Wapung Shnong, Wapung Skur, Mookhep, Tuber Kmai Shnong, Tuber Shohshrieh bad Shohshrieh. Ha kajuh ka por ka KSU Wapung Unit ka la ïoh ban pynkup burom ia ki ar-ngut ki nonghikai bala ïohbl ïa ka kyrdan PhD kita ki kynthup Dr. Heipor Uni Bang bad Dr.Tanbok Dkhar.
Ïa kane ka lympung pynkup burom la pynlong ha ka Wearing Memorial DCLP School Wapung Skur bad la pynïaid da u President ka KSU NEHU Unit U Samla Shibaitlang Rymbai.
U Kongsan ha kane ka jingïalum lang u dei u Samla Pynkmenlang Sanmiet uba dei u Education Secretary ka KSU CEC. Haba ai jingkren ula ong, “Ha ka jingim, ngi don la ki jong ki jingeh hynrei kaba kongsan ka long ka jingkut jingmut bad ka jingïaineh.” Ula bynrap shuh shuh,”Ki ar tylli ba ngim lah ban thied ha ka jingim ka dei ka jingnang jingstad bad ka jingkoit jingkhiah bad lada duh noh ïa kine ka Jaidbynriew kan ringswai.”
U Symbud kongsan uba dei ruh u Rangbah Shañiahskhem Dkhar Finance Secretary KSU East Jaiñtia Hills District u la kyntu kynpham ïa ki khynnah ba kin nang ïai minot ha ki jingpule jong ki.
