Boko, K’ Lyngkot 02: Ka Gijang Area A-Chik Cultural Arts and Sports Association (GAACASA) ka la pynlong ïa ka jingpynïakob Songkristan kaba 8 hapoh ka shnong Umshek kaba dei ruh hapoh ka madan ïalehkai kaba dang hab hapoh ka khappud Assam Meghalaya kaba ha West Khasi Hills District jong ka Meghalaya ha ka sngi Palei.
Ïa kane ka jingïakob la sdang da ka jingshad Garo ka Wangala ba la pyni da ki samla ka thaiñ. U Remington G. Momin, MLA Rambrai-Jyrngam Constituency u la shim bynta kum u kongsan.
U Lurshai Kharbani, u kyrtong MDC ka Malangkona-Sildubi, A’chik Holistic Awakening Movement (AHAM) president jong ka Aradonga Regional Unit u Spren G. Momin, General Secretary Jenggrim A Marak, FKJGP (Federation of Khasi, Jaiñtia and Garo People) President of Aradonga regional unit Trellingstar Shira, Kamrup District GSU ki la shim bynta kum kiba la shah khot sngewbha bad kumjuh ruh da ki spah ngut ki nongshong shnong ki Garo napoh Meghalaya bad Assam.
U MLA Remington G. Momin u la banjur da kaba ong ba kane ka Songkristan programme kadei ka cultural program ba kongsan jong ki paid Garo. “Lyngba kane ka Songkristan cultural program, ki paid Garo ki wanrah ïa ka jingsuk bad ka jingkyntiew lang hapdeng ki kynhun jaitbynriew. Ka Songkristan ka la pynïatylli ïa ki paidbah Garo bad ban shakri na ka bynta ki paidbah. Namar kata ngi rakhe ïa ka Songkristan programme manla u snem,” ongu MLA Momin.
U MLA Momin u la ong, “Ïa ka Songkrisrtan la ju rakhe ha ka sngi badei u snem thymmai. Mynta u snem nga la pynlong ïa kane ka jingïakob bad ki briew jong ngi bad la khot sngewbha ruh ïa kiba bun ki nongshong shnong jong ka thaiñ Gijang ba kin ïa shimbynta ha kane ka jingïakob. Kumta ki la don haduh 10 tylli ki kynhun kolshor na kiba bun ki shnong ki la shim bynta ha kane ka jingïakob. Kiba kynthup ki shnong kum ka Maspara, Malapara, Khasi Salbari, Malsapara, Athiabari, Ranikhat, Dogaon-Malang, Umshek, Madankillor, Rongdhali kiba hab hapoh ka Rambrai-Jyrngam Constituency kiba la shim bynta ha kane ka jingïakob Songkristan.”
Ka Ranikhat ka la ïoh ïa ka kyrdan kaba nyngkong, katba ka Maspara bad Dogaon ki la kynjoh sha ka kyrdan kaba 2 bad ba 3 ha kane ka jingïakob. Kiba jop ha ka kyrdan kaba nyngkong ki la ïoh 30 hajar tyngka, kaba 2 ki ïoh 20 hajar tyngka bad kaba lai kumba 10 hajar tyngka. Lah ban pynkynmaw ba ka Malapara cultural group ka la long ka lah duh mynshem snem.
Ha ka jingkren u MLA Momin u la banjur ba ka jingshad Wangala ka dei ka kolshor jong ki paid Garo bad ka Songkritan ka dei kolshor jong ka niam ki paid kristan jong ki Garo. “Nga kyrmen ba hadien habud baroh artylli ki sorkar ka Assam bad Meghalaya kin ïarap bad ban pynlong ïa kane ka prokram Songkristan.” U Momin u la kyntu ïa ki paidbah bad kiba bun ki kynhun kiba im ha kane thaiñ ba kin lah ban imlang ha ka suk ka saiñ bad kum shipara.
