New Delhi Lber 04: Ka Election Commission of India mynta ka sngi ka la sdang ïa ka jingïalang ba ar sngi jong ki CEO jong baroh ki Jylla/UT ha IIIDEM, New Delhi. Kane ka dei ka jingïalang kaba nyngkong kaba la pynlong hadien ba u Gyanesh Kumar u la shimti kum u CEC. U CEC bad ki EC Dr.Sukhbir Singh Sandhu bad Dr.Vivek Joshi ki la ïakren bad ki CEO halor ki kam bapher bapher ki ban plie ïa ka lad na ka bynta ka jingkyntiew ïa ka rukom pynïaid elekshon ha ka ri hapoh ki kyndon ba la buh.
Ha ka jingai jingkren, u CEC Gyanesh Kumar u la kyntu ïa baroh ki ophisar ba kynthup ïa ki CEO, DEO, ERO, BLO ha kylleng ka ri ba kin trei da ka jingshai ban pynurlong ïa baroh ki kam ba hap ban pyndep bad ruh ki mat treikam katkum ba la bthah hapoh ka RP Act 1950 & 1951; Registration of Elector Rules 1960, Conduct of Election Rules 1961 bad ki jingbthah ba la ai da ka ECI na ka por sha ka por.
U la bthah ïa ki ophisar ba kin plie lad bad sngap ïa ki seng saiñ pyrthei. U la ong ba dei ban pynlong ïa jingïakynduh bad ki seng saiñ pyrthei na ka por sha ka por ban pynbeit ïa kino kino ki jingeh katkum ki mat treikam ba la buh da ka bor ba dei peit kum ki ERO lane DEO lane CEO. Ïa ki kaiphod jong ki sienjam ba la shim da man ki CEO dei ban ai ha shuwa ka 31 tarik u Lber, 2025 sha ki DEC.
U la ban jur ba baroh ki CEO, DEO, RO, ERO ki dei ban peit bniah ïa ki kam bad ki jingbahkhlieh jong ki, kumba la batai shai hapoh ka aiñ bad ki jingbthah na ka ECI. U la ong ruh ba ki ophisar ki dei ban pynthikna ba baroh ki briew jong ka India kiba la dap 18 snem ka rta ki dei ban kyntiew kyrteng kum ki nongthep vote katkum ka Article 325 bad Article 326 jong ka Riti Synshar. U la ong ba baroh ki BLO ki dei ban ïoh jinghikai kumno ban don ka jingïadei kaba bha bad ki nongthep vote bad ruh ba dei ban pynthikna ba ym don mano mano ba pyntieng ïa ki briew kiba trei ha ki kam elekshon.
La bthah ïa ki ophisar ba kin shim ïa ki sienjam ban don hapdeng 800-1200 ngut ki nongthep vote ha man ka polling station bad pynthikna ba kine ki don hapoh 2 km na ka jaka sah jong baroh ki nongthep vote. Dei ban pynbiang ïa ki polling booth kiba don ïa ki jingshakri kiba la biang ban pynsuk ïa ka kam thep vote ha ki jaka nongkyndong. Ki polling booth ki dei ban don ruh ha ki building kiba jrong bad ha ki slum ban kyntiew ïa ka jingthep vote ha ki jaka sor.
Hadien ka jingpeit bniah ïa ki mat treikam katkum ka Riti Synshar bad ki aiñ, ka Commission ka la ithuh 12 jait kita kiba don bynta ha baroh kawei ka kam jied nongïalam ba kynthup ïa ki CEO, DEO ERO, ki seng saiñ pyrthei, ki kyrteng, ki polling agent bad kiwei kiwei. Kane ka jingïalang ka thmu ban pynkhlaiñ ïa ka jingkyntiew ïa ka bor treikam jong baroh kine ki 28 jait ki briew kiba don bynta ha kane ka kam kiba la pynïaphiah hapdeng baroh ki CEO ha saw tylli ki phang kiba long ki Electoral Roll.
Ka jingpynlong ïa ki Elekshon, ka jingpeit ïa ki kam bad ki Seng Saiñ Pyrthei/ Kyrtong, hapoh ka jingïalam jong ki saw ngut ki DEC kiba don ha ka Commission. Yn ai jingtip shuh shuh ynda la dep kane ka jingïalang.
Kane ka dei ka sien kaba nyngkong ba kumno kumno uwei u DEO bad uwei u ERO na man ka Jylla /UT ki la wan ïashim bynta ha kane ka jingïalang.
