Pynlong ka CIET, NCERT ïa ka AICEeC ba 3 sngi lynter ha NERIE

Nongpoh, Lber 30: Ka Central Institute of Educational Technology (CIET), hapoh ka jingpeit jong ka National Council of Educational Research and Training (NCERT), New Delhi ka la pynlong ïa kawei na ka jingïakop ba la tip kum ka ‘All India Children’s Educational eContent Competition’ kaba lai sngi lynter, kaba la sdang naduh ka 26 tarik u Lber 2025 haduh ka 28 tarik u Lber, 2025 ha phyllaw ka North East Regional Institute of Education (NERIE), Umiam.
Ha kane ka jingïakop la shim bynta kumba 700 ngut ki khynnah skul na ki skul bapher bapher ka ri ban ia kop halor ka rukom thoh (e-Content) kiba dei shaphang ki rukom thoh katkum ka juk stad mynta bad ka thong jong katei ka jingïakop ka long ban nang pynïar ïaka jingnang ka jingtip bad ka jinghikai lyngba ka juk stad kaba mynta bala shim bynta da ki khynnah, ki nonghikai, ki khraw pyrkhat ban wanrah ki jingkylla haka liang ka pule ka puthi.
Kane ka jingiakop ba la pynlong ka kham ban khia ruh halor kita ki rukom thoh rukom tar ban pynwar dur katkum ka juk mynta (digital educational content) na ka bynta ki samla pule ha kane ka juk stad ba mynta kaba dei ruh shibynta jong ka National Education Policy 2020.
Ha katei ka sngi la sakhi ruh da ka jingdonlang u Dr. Amendara P. Behera, Joint Director of CIET (NCERT) New Delhi, Prof. F.G Dkhar Principal ka NERIE bad kiwei kiwei.
U Dr. Amendara P Behara Joint Director of CIET (NCERT) New Delhi u la ong baka jingïakob eContent, kaba la pynbna naduh u bnai Risaw 2024, ka la don palat 700 ki nongthep kyrteng haduh ka 31 tarik Kyllalyngkot, 2025. La khot haduh 150 ngut ki nongïashim bynta na kylleng ka ri India ban noh synñiang, bad ki don kumba 70 tylli ki jait khusnam, ryngkat bad ki jingai jingkyrshan naduh T.5,000 haduh T.40,000, ban pynshlur ïa ka jingpynmih ïa ki jingthoh digital kiba bha tam. Ïa kine ki jingthoh ba jop yn pyni ha ka eVidya Channel jong u Myntri Rangbah duh ka ri, ba la pynmih da ka tnad pule puthi jong ka sorkar India, ban kyntiew shuh shuh ïa ka jingmyntoi jong ki ha ki jaka ai jinghikai.
Kane ka jingthmu ka dang bteng ban pynshlur ïa ki khynnah skul, ki nonghikai, bad kiwei kiwei ki nongshim bynta ha ka liang ka pule puthi bad ki lad pathai khubor ban ïatreilang ha kaba thaw ïa ki jingthoh kiba katkum ka juk stad kaba mynta kiba lah ban ai ki jingmyntoi naka bynta ka jinghikai, jingpule, bad jingbishar bñiah ha ki skul.