Nongpoh, Lber, 30: U Symbud Myntri Rangbah ka Jylla uba khmih ïa ka tnat PWD (Roads) Bah Prestone Tynsong u la kular ban pynïoh da ka surok rong kaba ym duna ïa ka jinglut kaba hapoh T. 5 klur ka ban pynïasoh na surokbah sha jaka pynlong ïa ka tamasa shad Sajer jong ka Raid Nongpoh ha u Lum Wyrtoh.
Ïa kane u Bah Tynsong u la pynpaw haba kren kum u kongsan ha ka jingplie pyrda ïa ka tamasa shad Sajer jong ka Raid Nongpoh kaba la long ha ka sngi Saitjaiñ.
U Bah Tynsong u la ong ba ka jingmang pisa ban shna ïa ka surok yn pyntreikam noh ha shuwa ka Financial Year jong u snem 2025-26.
Katba ka MDC jong ka Nongpoh Constituency ka Kong Rona Khymdeit haba kren ha kane ka sngi ka la pynsngew halor ka jingdonkam ban shna noh ïa ka surok Nongpoh, Umden, Sonapur kaba ladep ban buh mawnongrim dang shen bad ki paidbah mynta ki la angnud dikdik ban ïohi noh ïa ka surok rong.
Kum ban shu pynkynmaw, ïa ka surok Nongpoh, Umden, Sonapur kaba jrong 20 kilomitar ladep ban buh mawnongrim ha ka 10 tarik, Nohprah 2024 ha ka jinglut kaba kot kumba T. 49.53 klur ba la mang lyngba ka State Plan, katba ïa ka surok na Umden sha Sonapur kaba jrong kumba 38.6 kilometre la mang pisa kumba T. 47.20 klur lyngba ka PMGSY III Batch-I, hynrei haduh mynta ym pat ïohi dak eiei ban sdang trei noh ïa ka surok.
