Pynlong ka CBC Shillong ïa ka photo exhibition ban rakhe ïa ka Azadi Ka Amrit Mahotsav ha NIT

Shillong: Ka Central Bureau of Communication (CBC), Tnat Information and Broadcasting, Sorkar India, Regional Office, Shillong ka la pynlong ïa ka Photo Exhibition Outreach Activity kaba lai sngi ban rakhe ïa ka Azadi Ka Amrit Mahotsava ha NIT Meghalaya, Shillong.
Ha kane ka exhibition la pyni ïa ka jingïakhun jinglaitluid jong ka India lyngba ka jingpyni ïa ki dur bapher bapher. U Director i/c, NIT Meghalaya, Prof. Ayon Bhattacharjee, uba la plie ïa ka photo exhibition mynta ka sngi. U la ïaroh ïa ki sienjam jong ka CBC Shillong kaba la pynlong ïa ka multimedia exhibition bad kyntu ïa ki samla pule ban leit jngoh ïa kane ka exhibition. U la ong ba ka photo exhibition jong ka CBC halor ka Azadi Ka Amrit Mahotsav ka plie lad ban phai biang sha ka por jong ka jingïakhun jinglaitluid ka India bad ban sngewthuh ïa kito ki por. Ka Amrit Mahotsav kadei ka jingrakhe ïa ki jingjop ba khraw jong ka India tang hapoh ki 75 snem.
Ka jingthmu kalong ruh ban pynsngewthuh ïa ki briew shaphang ka histori bad ka pateng ba riewspah jong ngi, u la bynrap. U la kyrpad ruh ïa baroh ki nongïashim bynta ban kyrshan bad trei na ka bynta ki jingangnud ba ki nongïakhun jinglailtluid ki khmih lynti na ka bynta kane ka ri bad ban bud ïa ki nongrim ba kongsan ba ïoh mynsiem na ka jingiakhun jinglaitluid.
Haba ïaroh ïa ki riewshlur jong ka jylla Meghalaya- U Tirot Singh, U Kiang Nangbah bad Pa Togan Sangma, u Prof Atanu Banerjee, Dean i/c Students Welfare Academics, NIT Meghalaya, Shillong u la ong ba lyngba ki dur ba la pyni ha kane ka exhibition, ngi lah ban ïoh jingtip shaphang kine ki riewshlur bym paw pyrthei jong ka thaiñ shatei lammihngi kiba la nohsynniang shikatdei na ka bynta ka India kaba laitluid. U la pynpaw ka jingngeit jong u ba kane ka exhibition kan ïarap bha ban ai jinghikai ïa ki briew, bad khamtam ki samla pule, shaphang ka jingaiti ba khraw jong ki nongïakhun jinglaitluid jong ngi na ka bynta ka ri.
Ka Dr Moushumi Dey, Faculty Member, History Dept Women’s College, Shillong ka la kren halor ka phang “Ladies Freedom Fighters: Unsung Heroes of Meghalaya”. Da ka jingsngewsarong ka la batai ïa ka jingshlur jong katto katne ki longkmie kiba ïakhun ïa ka jinglaitluid na ka thaiñ shatei lammihngi ha ryngkat kiwei kiwei kum ka Phan Nonglait jong ka jylla Meghalaya, Manorama Banerjee jong ka Tripura, Rani Gaidinliu jong ka Manipur, Helen Lepcha jong ka Sikkim bad Kanaklata Baruah jong ka Assam.