Nongstoiñ, Lber 6: Ka lympung Invitation Knockout Football Tournament 2022-23 ba la pynïaid da ka New Nongstoiñ Sports Social and Cultural Club, ka la jam mynta sha ki semi final ba khatduh lane ‘2nd leg semi final’, ha kaba ha ka 7 tarik sngi hat majai, ki ar kynhun kata ka Assam Regiment sa shisien kan ïakynduh ïa ka Ri Bhoi United, na ka bynta ban ïakhun ban ïoh rung sha ka final jong kane ka lympung ba mynta u snem.
Lah ban pynkynmaw ba ka Assam Regiment ha ka wat ba nyngkong lane 1st leg jong ka semi final, ka la lah ban jop da ar kol la kawei pyrshah ïa ka Ri Bhoi United. Kumta, kan long ka jingïalehkai kaba itynnad hapdeng kine ki ar kynhun, namar kan dei beit ka jingïalehkai ïakhun doh ïap jong baroh ar kynhun ban ïoh ruh sha ka final.
U Bah G.Syiemlieh nongïalam rangbah ka NNSSCC, ha u kyrwoh khubor u la ong ba ka Assam Regiment kan wanrah thymmai lut ïa ki rang ïalehkai ha kane ka jingïalehkai bad jan baroh hi ki dei na ka kynhun jong ka Services.
Katba na ka liang ka Ri Bhoi United lei lei kan wanrah syndon da ki rang ïalehkai Indian Super League, kumjuh ruh ki rang ïalehkai kiba leit shim bynta sha ka lympung Santosh Trophy.
Kumta, na ka liang ka NNSSCC ka khot ka wer sha baroh ki paidbah ba ieit phutbol jong ka sor Nongstoiñ, ban hiar sakhi dalade ïa kane ka jingïalehkai ka ban sdang thik ha ka por 1:50 noh phai sngi sngi ha madan New Nongstoiñ.
