Shillong, Risaw 14: Ka Umphrew Sports Club ha ka sngi Saitjain ka la pynlong ïa ka Inter House Football Tournament na ka bynta ki nongshong shnong, ba kynthup ïa ki khynnah, ki samla, kumjuh ki rangbah ba kin pynmlien ban ïalehkai na ka bynta ban pynbha ïa la ki sap ki phong bad na ka bynta ka koit ka khïah.
Ha kane ka jingïalehkai ba shisngi jong ki la ïa don lang u Bah PT Sawkmie, MLA barim kum u kongsan, uba la pynpaw ïa ka jingkyrshan jong u ïa ka Sports Club da kaba nohsynnïang da ka khusnam pisa sha ka kynhun kaba nyngkong bad baar ha kane ka Inter House.
Ha kane ka jingïakhun ka Blue House ka la iohrah ïa ka namlahduh bad ka Green House ka la wan baar.
Haba ai jingkren ha kane ka sngi u president ka Umphrew SC u bah Listarwell Nongbri u la pynpaw ba la kham slem ki khlem ioh ban ïalehkai Inter Dong ne ki Inter House shuh hapoh shnong, hynrei ki sngewkmen eh ïa u bah PT Sawkmie uba la kyrshan ïa ki ba kin ioh ban ïalehkai pat sa shisien.
U la pyrto ïa ki kam jong u, uba ju ïai ïarap ïa ki jingdonkam jong ki Sports Club hapoh ka thain naduh ki por ba u long MLA haduh mynta ba um long eiei shuh.
Katba na ka lïang u bah PT Sawkmie u la pyntip ba shen un sa pynlong ïa ka Open To All Football Tournament na ka bynta ki Sports Club hapoh Mawlai bad kumjuh na ka bynta ki shnong kiba marjan bad ka Umphrew, ka shnong kaba marjan bad ka Umroi, Ri Bhoi.
U pyntip ba un aiti ïa kane ha ka Umphrew SC ba kan pynlong ïa kane ka lympung ïalehkai, khnang ba ki shnong ki thaw kin shongshit, khamtam ba kin lah ban kyntiew ïa ka football hapoh ka thain, kaba long kaba donkam bha na ka bynta ki khun samla kane ka juk kaba mynta.
“Haba don ka tournament, ki khynnah ruh ki sngewtynnat ban kilanmet ne practice, hynrei da ym don, ym sngewkwah hi ruh ban practice,” ong u bah Sawkmie. “Hynrei ki don pat kiba ieit phutbol, lada don ne ym don ruh ki sngewtynnat ban practice.”
Kumta u pynpaw ba u sngewkhïa bha ha kine ki sngi kiba mynta bym ju don tournament shuh.
U la pynpaw ba u dap da ka jingkmen ban iohi ba ka Umrynjah SC ka la kiew sha ka 3rd Division na 4th Division bad ka Mawtawar SC ka don ha 1st Division, kumta u khmih lynti ba ka Umphrew ruh ha kawei ka sngi kan ïoh ban ïa shim bynta ha ka 4th Division.
