Jowai, Jylliew 27: Kawei na ki jingthmu ba kongsan jong ka Telecom Regulatory Authority of India (TRAI) ka dei ban ïada bad ïarap ïa ki nongthied nongpet, kumta kala pynlong ïa ka prokram Consumer Outreach Programmes (COP), workshops halor ka capacity building of consumer organisations and seminars etc, kaba la long ha Nongtalang College, Nongtalang, West Jaiñtia Hills District.
Ka TRAI (Regional Office Kolkata) mynta ka sngi (27.06.2024) kala pynlong ïa kane ka prokram shi bynta ban ai jingtip ba kham bniah bad ban pynsngewthuh ïa ki paidbah ïa ka jingthmu ba donkam jong ka TRAI.
Nalor ki paidbah la don ruh ki riew rangbah ba shah khot sngewbha na Telecom Service Providers participated kiba la shim bynta ha kane ka program. Ka G. Shabong, CCA, NE-I, Department jong ka Telecom kala long kum ka kongsan bad u D. Pandey, SDPO, Amlarem kum u symbud kongsan. Katba u Dr. Ryan Reid Kharkongor, Principal, Nongtalang College, Nongtalang ula long kum u nongshah khot sngewbha ba kyrpang.
Ka kongsan haba kren kala batai ïa ka jingdonkam kum kine ki jait jingpynsewthuh paidbah ha ki jaka ba jngai na ki sor. Ka la kyntu ïa ki samla pule ban long kiba laitluid ban kren ïa kaba don haka jingmut jong ki bad ïathuh ïa ki jingeh jong ki haka jingïadei bad ka network connectivity.
U Pandey, haka jingkren ula kyntu ïa ki samla pule kiba don ha kane ka jingïalang ba kin wan sha khmat ha ka jingïadei bad ki jingeh ba ki ïa kynduh bad ka network connectivity sha kane ka thaiñ. Kum kita ki jingeh ka TRAI bad kiwei de kin ïoh ban shong pyrkhat.
