Pynliem ka SWKHD-FC ïa ka Rangdajied United FC ha ka Charitable Football Match

Mawkyrwat, Nailar 29: U bah Lambokstarwell Marngar uba dei u President jong ka Khasi Students’ Union (KSU) Central Body kum u kongsan ha ka jingkren jong u ha ka jingïalang kaba dei jong ka jingïalehkai Charitable Football Match u la ong ba ka Jylla Meghalaya jong ngi ka don tang kumba 15 lak ei ei ki nongshong shnong hynrei ki briew kiba la kyrni u droks pat haduh 3 lak ei ei, “kane shaei kan ïalam ïa ka jaidbynriew?”.
Kumta da ka jingpynlong jong ka Khasi Students’ Union (KSU) jong ka South West Khasi Hills District, ka KSU Mawkyrwat Circle ha ryngkat ka jingïatreilang ka Life Care Foundation ïa kane ka lympung ïalehkai kynkjatbol hapoh Madan MDSA Artificial Turf, Nonglang, South West Khasi Hills District kan long kawei ka atiar ban kyrshan ïa ka jingthmu ban tei ïa ka Rehabilitation & Counseling Centre ne ka shlem hikai ban pyllait jingkyrni dih Drok.
Namarkata, u la pynpaw ka jingaikhublei kaba kyrpad ïa ka KSU kaba la shim ïa kane ka synjam kaba long shibynta ban ai mynsiem ïa kito kiba don ka jingthmu ban trei bad pyntyllun ïa kam ban rad-dyngkhong ïa ki kam sniew khamtam eh ïa u droks. “Ban rad-dyngkhong ïa kino kino ki kam sniew kam shong eh tang ha uwei ne ar ngut ki briew hynrei ka donkam eh ïa ka jingïatreilang na baroh ki liang kata na ka la ïing la sem, na ka shnong ka thaw, ka imlang ka sahlang, ka ri bad ka jaidbynriew”, ong u bah Lambokstarwell Marngar.
Lah ban kdew ba katei ka lympung ïalehkai kynjatbol kaba la tip kum ka Charitable Football Match la pynlong khnang kum shibynta ban pynmih pisa ne fund ha ka ban pyntyllun ban tei ïa ka Rehabilitation & Counseling Centre ne ka shlem hikai ban pyllait jingkyrni dih Drok kaba la shna da ka Life Care Foundation ha shnong Sohkhyllam bad ka dei ka bym pat ïoh jingïarap ei ei ruh em na ka sorkar haduh mynta.
Ki kynhun kiba la wan ban ïashimbynta ki la long hapdeng ka Rangdajied United Football Club pyrshah ïa ka South West Khasi Hills District Football Club ha kaba ïa ka nam jop la rah da ka South West Khasi Hills District Football Club lyngba da ka 1 – 0 kol.
Yn tang kata, ka la don ruh ka jingpynïalehkai kynjatbol hapdeng ka Officers’ Club, South West Khasi Hills District pyrshah ïa ka KSU South West Khasi Hills District ha kaba ka kynhun Officers’ Club, South West Khasi Hills District ka la jop da 5 – 1 kol.
Hadien ba kut jong ka jingïalehkai, la ïoh ruh ban sam ïa ki khusnam sa baroh ki saw tylli ki kynhun kiba la ïoh ban ïashimbynta ha kane ka Charitable Football Match.
Kiwei de ki riew rangbah kiba la ïadonglang ki kynthup ïa u bah Forwardman Nongrem, President ka KSU South West Khasi Hills District, ki nongkitkam lem bad dkhot jong ka KSU kynthup na ka Central Body, u bah H.S. Diengdoh, President jong ka South West Khasi Hills District Swimming Association, u bah S. Marweiñ, MCS, BDO ka Ranikor C&RD Block, lem bad kiwei de ki riew rangbah ryngkat ki paidbah nongwan peit kai kiba na kylleng ki shnong.